Зубайдат Шябанова

 

Табасаран райондин Кьалухъ Мирзайин ччвурнахъ хъайи спортдин дараматдиъ 9-пи майди Аьхю Гъалибвалин 81 йис хьпаз бахш дапIнайи спортдин фестиваль волейболин финалин талитариинди аьхирихъна гъафну.

 

Аьхиримжи йисари майдин машкврарин йигъари гъахури аьдатнаъ абхънайи спортдин фестиваль гьаму йисанра райондин администрацияйи тешкил гъапIнийи. Фестивалин дахилнаъди юкьяр дисбаан, грепплингдиан талитар ва волейболиан, футболиан Табасаран райондин чемпионатар кIули гъушну.
Волейболиан финалин талитариз райондин ДЮСШ-дин 3-пи нумрайин мектебдин ва Гьесихъ гъулан командйир удучIвну. Кьюб сетдиъ гъалибвал гъадабгъбиинди Гьесихъ гъулан командайи учв райондиъ варитIан заан устадвал айиб вуйивал субут гъапIну. ДЮСШ-йин жигьил, ужудар мумкинвалар айи команда кьюбпи йишван сагьиб гъабхьну. Шубубпи йишв Улуз гъулан волейболистари гъазанмиш гъапIну.

Гьадму йигъан райондиъ «Чвйир» ва Ягъдигъ гъулан командйирин арайиъ футболианра финалин талитар гъахьну. Улупнайи асас вахтна дурарин арайиъ гъалибчи фуж вуш, мялум гъахьундайи. Матчдин кьяляхъ ирчри гъахьи пенальтйирин натижйириинди Ягъдигъ гъулан команда улихь удубчIвну ва Табасаран райондин чемпион гъабхьну. Кьюбпи йишв «Чвйир», шубубпи йишв «Алпан-нефть» командйири гъазанмиш гъапIну.

Футболин ва волейболин турнирарин призерар ва гъалибчйир кубокариинди, тялукь медалариинди ва багьалу пешкешариинди лишанлу гъапIну.
«Йислан-йисаз майдин спортдин талитарин турнирариъ иштирак шулайи командйирин кьадар артухъ шула. Миди Табасаран райондин гъулариъ аьхиримжи йисари арццу 30-тIан артухъ спортдин майднариин ихь жигьилариз ва живанариз хуларихьан ярхла дарди спортдиин машгъул хьуз, футболин ва волейболин уйнамишар гъахуз мумкинвал айиваликан кIура. Ва гъи натижйирра ужудар рякъюрахьуз», – гъапну турнирин шадлугънан пайнаъ иштирак шулайи вахтна Табасаран райондин глава Мягьямед Къурбановди.