Мейлан Нежефов

Гьаму йигъари Хив райондин ветеринарный управлениейи мал-къарайиз ящур уьзриз аькси вуйи рубар йивбан серенжем кIули гъубхну.

 

– Гьамусяаьт мал-къарайиз ящур уьзриз аькси рубар йивурача. Му дармникан ккудубзурайи никкдиз, ясана убккурайибдин йиккуз саб хатIара адар. Малар, марччар хянаъ имиди, гьарубдин чан улупнайи вахт гъидипури, 1-пи апрели лиж адапIайиз, ифйир адагъбан, сибирин язва, бруцеллёз, эмкар, эпидидимит, битIар ва жюрбежюр жара уьзрариз аькси рубар йивбан серенжемар планламиш дапIнача. Гьаци, пеэр, гъазар-бадбадарин ньюкаслин уьзриз аькси вакцинацияра пландик кипнача. Зиихъ узу кудухнайи вари уьзрар ихь йишвариз гъирагъдилан хурайи мал-къарайихьди гъюрайидар ву. Гьяйифки, мидкан учуз я чпи ариш-вериш апIурайидари, я гъуни-гъуншйири вахтниинди хабар туврадар.

Ихь абйирин мисалиъ дупна: «Саб цих хъайи агълижи вари сюре кабцIру». Гьаци хьузра ву. КетIебццнайи мал-къарайин дердназ вахтниинди дилигди, фу-вуш суракь дарапIди, думу кIуллан алдадапIди, гьаддикан закур хянаъ ва мягьлайиъ айи мал-кIулиз зарар гъабхьиган, ихь инсанарихьан «вагь» тaдабхъуру. Амма думуган кьан шулу. КIурайибдин вари дюзди гъавриъ ахъну, сар жвуван ваъ, хъа вари жямяаьтдин гъайгъушнаъ хьуб ва дюзвал ади ликар алдагъуб ккун апIураза, – кIура маларин духтир Салман Мягьямедбеговди.