Зубайдат Шябанова
Гьаму йигъари Табасаран райондин гимназияйиз ва Гисик гъулан мектебдиз цIийи автобусар жара апIбахъди аьлакьалу шадлугънан мажлис кIули гъубшну.
Серенжемдиъ райондин администрацияйин вакилар, кьюбиб мектебарин кIулиъ айидар, мектебариъ урхурайидар, гьацира муниципалитетдин жюрбежюр тешкилатарин, идарйирин гъуллугъчйир иштирак гъахьну.
«Ихь важиблу месэлйирикан ва вазифйирикан саб мектебариъ урхурайи баяр-шубариз деврин тIалабариз жаваб тувру шараитар арайиз хуб ва дурар, хатIасузвал уьбхюри, мектебдиз ва дарсарин кьяляхъ хулариз гъахуб вуйихь. Мектебдин автобусари баяр-шубар вахтниинди мектебарин дарсариз хъуркьуз, ярхла айи баяр-шубариз заан ери айи образование гъадабгъуз мумкинвал тувра. ЦIийи машинар ихь урхурайидар бадали кьаназ лихури гъузур кIури, умуд кивраза. Райондин вари агьалйирин терефнаан республикайин ва РД-йин образованиейин министерствойин кIулиъ айидариз ихь райондин образованиейин месэлйир гьял апIбаз фикир ва кюмек тувбаз чухсагъул пуз ккундузуз», – гъапну Мягьямед Къурбановди, мектебарин директорарихьна цIийи автобусарин жюлгар туври.
Дугъриданна, аьхиримжи вахтари Табасаран райондин образованиейин цирклиъ хайлин ужудар дигиш’валар шула. «Образование» милли проект уьмриз кечирмиш апIури, Табасаран райондин мектебарин автобусарин парк саки гьар йисан цIийи автобусариинди артухъ шула. Гьаци 2019-пи йисхъанмина райондин мектебариз 46 автобус жара гъапIну. Гьамус парк кьюбсана цIийи автобусдиинди артухъ гъабхьну.
Райондин гимназияйин директор Элина Шихягьмадовайи ва Гисик гъулан мектебдин директор Гьяжи Гьяжиевди Табасаран райондин глава Мягьямед Къурбановдиз ва РД-йин образованиейинна илимдин министерствойин кIулиъ айидариз чпиз гьаммишан кюмек тувбаз чухсагъул мялум гъапIну.
Гисик гъулан мектебдин директор Гьяжи Гьяжиевди ич сюгьбатнаъ къайд гъапIганси, дурариз мектебдин автобус жара апIури сабпи раж ву.
«Учу автобусдиз ккилигури сад йискьан вуйич. Ич мектебдиз Ляхя гъул’анра 20 кас урхурайидар гъюра. Ляхя гъулан сар бицIир мектебдихьан лап ярхлади яшамиш шула. Думу хуз саки 3 километр душну ккунду. Кьюрдун вахтна, мархь убгъруган машин чарасуз лазим шулу. Гьамус думу машин Ляхя гъул’ан баяр-шубар хузси, Хючна гъулаз дурар ЕГЭ-йиз гъахру вахтнара, «Пушкиндин карта» программайиан бицIидар райондиъ гъягъру серенжемариз, экскурсйириз гъахузра ишлетмиш апIуз хьибди.
Гьяйифки, гьелелиг машин хъапIрур дидихънадарчуз, фицики «Д» категория айи кас ич гъулариъ адар, жара йишвариан маважиб бицIиб вуйивализ лигну, гъюз ккундар. Гьамусяаьт му месэла гьял апIру рякъяр агураза», – гъапну ич сюгьбатнаъ Гьяжи Гьяжиевди.
Къайд: «Мектебдин автобус» проект 2021-пи йисхъанмина уьмриз кючюрмиш апIуз хъюгънийи. 2021-2025 йисарин арайиъ му программайин дахилнаъди Урусатдин регионариз 25,4 агъзур автобус тувну.
