Зубайдат Шябанова

Улихьна йигъари Табасаран райондин Дарвагъ гъулаъ саб хизандиъ кьюр инсан кечмиш хьпахъди аьлакьалу бедбахтвалин дюшюш гъабхьну. Ахтармишари тасдикь гъапIганси, дурар чпин хулаъ угарный газдиан бугъмиш духьну гъийихдар ву.

 

Табасаран райондин глава Мягьямед Къурбановдин табшуругъниинди гьадму дюшюш гъабхьи йишв’ина райондин газдин цирклиъ гъуллугъ гъабхру идарайин вакилар, Дарвагъ гъулан глава Айдин Къурбанов ва полицияйин гьуркIу ихтиярар айи (уполномоченный) участковый гъушну. Дурари бедбахтвал гъабхьи хуларин газран турбйир ахтармиш гъапIну.

«Газпром газораспределение Дагестан» ООО-йин филиалин райондиъ айи ремонтаринна эксплуатацияйин гъуллугънан начальник Гьяжимягьямад Гюловди гъапиганси, хулариъ газ зигбан терефнаан саб тахсирра гъибихъундар. Хулаъ ишлетмиш апIурайи газран оборудованиера сертификат айиб ву.
Гьамусяаьт республикайин прокуратурайи му дюшюшдин гьякьнаан гюзчивалар ва ахтармишар гъахура.

Мягьямед Къурбановди, му дюшюшдиъ кечмиш гъахьидарин багахьлуйириз башсагълугъвал ккун апIури, райондин вари агьалйирихьна илтIикIури, гьар йисан чпин газран гъурулушар технический жигьатнаан бинайиан ахтармиш апIувалихьна дих гъапIну ва гъабхьи бедбахтвалин силис гъабхбан ляхнар чан гюзчиваликкна гъадагъбакан гъапну.

Къайд дапIну ккундуки, кечмиш гъахьидар райондиъ яшамиш шулайидар дар. Дурар чпин гъулаз машквраз жара йишв’ан гъафидар вуйи.