Зубайдат Шябанова
Гьаму ктабхъурайи йисан аьхириз Табасаран райондиъ «Дагъустан Республикайин образованиейин мектебарин модернизация» программайин дахилнаъди цIийи алаъбан расвалин ляхнар ккудукIну, 5 мектеб арццуз планламиш дапIна. Дурар Кьюрякк, ТIивак, ЦIанак, Хили-Пенжигь, СиртIич гъулариъ арццди. Хъа Туруф гъулаъ бинайиан цIийи мектебдин дарамат тикмиш апIура. Гьаму йигъари Табасаран райондин глава, мектебарин тикилишарин ляхнар фици гъягъюраш, улупнайи вахтназ мектебар арццуз хъуркьраш ахтармиш апIбан метлеб ади, гьаму хьубрид гъуларизра гъушну. Вари мектебариан жикъиди мялуматар туврача.
ТIивак
Му гъулаъ ерлешмиш дубхьнайи Ю. Базутаевдин ччвурнахъ хъайи мектебдиъ расвалин ляхнар графикдиинди гъягъюра. Цалар гьякру дарсну гьязур дапIна, тукарин симар ва манишин тувру гъурулуш цIийи алаъну, багарихьди классариъ цIийи раккар гъивру. Дегьлизариъ кафель кивна, классариъ ламинат ккабхьра. ЧIатинди вуйи цаларик гьеле кучнадар. Дурар къайдайиз духну, керамогранит иливуз ами. Райондин кIулиъ айирин гафариинди, тикилиш’валин ляхнар гъахру вахтна мектебдиъ цIа кабхъбан хатIасузвал уьбхбан месэлйиризра ужуб фикир тувра. Мушв урхурайидаризра, мялимаризра ужудар шараитар айи мектеб хьибди.
Туруф
Туруф гъулан мектеб «Образование» милли проектдин бинайиинди тикмиш апIурайиб ву. Думу кьюб мертебайин 100 урухурайидариз деъру йишв айи дарамат тикмиш апIуз 2022-пи йисан хъюгънийи. Райондин главайи Турфарин мектебдин дарамат дивувал тикилишчивалин тасдикь дапIнайи графикдихъди гъябгъюраш, ахтармиш гъапIну. Подрядчикдин вакили къайд гъапIганси, мектебдиъ айтIан ва чIатан вуйи асас цаларра ккудукIну, ляхнар саки аьхирихъна гъюра, вентиляцияйин ва манишин тувру гъурулуш ляхник кипна. Багарихьди мебель хибди. Мектебдин гьяятдиъ, рякъяриъ гъван ккабхьна, жаргъру рякъярра ади минифутболин майданра абццди.
Тикилишариин 30-рихьна инсанар лихура. Мектебдин дараматар улупнайи вахтназ ккудукIуз планламиш дапIна.
ЦIанак
ЦIанак гъулан мектебдиъра бинайиан расвалин ляхнар «Образованиейин артмиш’вал» федеральный проектдин «РДйиъ образованиейин мектебарин гъурулушарин модернизация» программайиинди гъахурайидар ву. Мектебдиъ айтIан расвалин ляхнар аьхирихъна гъафну, цIийи полар ккахьну, цIийи раккнар гъивну, манишин тувру гъурулуш цIийи алапIну, цIа кабхъуваликан хабар тувру алатар мюгькам гъапIну. Мектебдин улхьан терефнан цалар цIийи алаувалин ляхнарра аьхирихъна гъюра.
Тикилишчйири гъийин йигъаз хурагар гьязур апIру хал, библиотека, спортзал рас гъапIну.
Хили-Пенжигь
Хили-Пенжигь гъулан мектеб кьюб дараматдикан ибарат ву. Гьаму йисан мектебдинкьюбпи корпусдиъ бинайиан расвалин ляхнар гъахура. Пландиз тялукь вуди, гъийин йигъаз айтIан ляхнар вари аьхирихъна гъафну. Гьадму гьисабнаан цалар, полар, раккнар,
тукарин симар, сигнализация вари цIийи алаъну. Сабпи корпусдиъра айтIан ляхнар гъахуз ими. Му корпусдиъ расвалин ляхнар 2010-пи йисхъанмина духну адайи.
СиртIич
Улихьна йисари СиртIич гъулан мектебдиъ «100 мектеб» проектдин бинайиинди манишин тувру гъурулуш цIийи алапIнийи, таза унчIвар ва раккар гъивнийи. Гьаму ражари мектебдин гъваъ, электрикдин симар цIийи алаъну, кьюбпи мертебайиъ классарин цалар къайдайиз гъахну. Гьамусяаьт рабочйирин дестейи мектебдин улихьинди вуйи цалар цIийи алаура. Дидин кьяляхъ классариъ кьулар ккахьди ва сабпи мертебайиъ расвалин ляхнарихъ хъюгъди.
СиртIич гъулан мектебдиъ дибдиан расвалин ляхнарихъ сентябрин аьхирариъ хъюгънийи. Ноябрин аьхирариз вари ляхнар ккудукIну ккунду. Гъахурайи расвалин ляхнарин кюмекниинди, му гъулан мектеб гъюру урхбан йисхъанмина башламиш дапIну,
гьяфтайиъ хьуд йигъан дарсар кивру къайдайиина улдубчIвуз мумкинвал хьибди.
Кьюрякк
Кьюрякк гъулан мектебдиз шубуб гъул’ан 150-рихьна бицIидар гъюра. Дурар Кьюрякк, ЧIвурдаф ва Урзигъ гъуларин баяр-шубар ву. Мектебдин гъваъ рас дапIну ккудубкIну. Багарихьди полар, классарин ва дегьлизарин гъваар, манишин тувру гъурулуш, классарин кабинетар рас апIуз хъюгъру. Мектебдин цаларра, библиотека айи цоколин мертебара рас дапIну къайдайиккна хибди.
Шиклариъ: Расвалин ляхнар гъахбан кьяляхъ ТIивак, Туруф ва ЦIанак гъуларин мектебарин чIатан рябкъювалар
