Феруза Рамалданова
Хив райондин саки вари уьмуми образованиейин мектебариъ расвалин ляхнар кIули гъягъюра. Райондин образованиейин отделин начальникдин заместитель Азадин Юсуфовди къайд апIурайиганси, мектебариъ цIийи урхбан йисахьна гьязурлуг’валин ляхнар гъахуб бицIидар тятIилариз деетубси башламиш гъапIну.

– Улупнайи вахтназ Хив райондин асас пай мектебариъ расвалин ляхнар ккудукIна. Хъа Ккугъ ва Кашкент гъуларин уьмуми образованиейин мектебариъ бицIи-бицIи ляхнар тамам апIуб давам шула. Гьаму йигъари дурарра ккудукIиди.
Ляхлаарин мектеб гьамусдиз кьюб тикилишдикан ибарат вуйи. Душваъ, урхурайидарин кьадар цIиб хьувал себеб вуди, ккергъбан классариъ урхурайи баяр-шубарира цIийи урхбан йисаъ аьгъювалар асас тикилишариъ гъадагъиди. Хъа гьамусдиз вуйи ккергъбан мектебдин тикилиш бицIидарин багъ ерлешмиш апIру саягъниинди ккабалгну. Фицики му гъулан бицIидарин бахча хусуси хулариъ ерлешмиш дубхьнайи. Дурар лап йирси духьну, бицIидар кьабул апIуз лап хатIалу гьялназ дуфнайи. Натижайиъ му месэла айи мумкинвалариз дилигну гьял апIуз уьлчмйир кьабул дапIна.
Зиихъ кудухнайи расвалин ляхнарилан савайи улупнайи вахтназ Сюгют гъулан мектебдин тикилишарин гъваъ дигиш апIбан ляхнар егинвалиинди тамам апIура. Августдин кьялариз саки вари образованиейин ужагъар, ширар, гьяквар йивну, баяр-шубар кьабул апIуз гьязур дапIна. Хъа зиихъ улупнайи Ккугъ ва Кашкент гъуларин мектебарин ужагъарин ишлетмиш’вализ улупнайи муддат филатIан ккудубшна. Дурар тялукь ахтармишарин бинайиинди хатIалу гьялназ дуфнайидар вуди гьисабнаъ а.
Мектебарилан савайи, хьадан фаслиъ бицIидарин багъариъ расвалин ляхнар гъахбазра фикир туврача.
Гьаци, июньдин вазлин эвелариан Хив гъулан «Ригъ» ва «Ромашка» бицIидарин бахчйирин либхувал дебккну, расвалин ляхнар тамам дапIна, - гъапну А.Юсуфовди.

Аьлава апIурза: ав, айи мумкинвалариз лигну, Хив райондин гьюкмин кIулиъ айидари баяр-шубариз аьгъювалар ва тербия тувбаз вари кьувватар сарф апIура. Мектебдиз улихьна вуйи федералин образованиейин гьякьнаан вуйи тялукь программа уьмриз кечирмиш апIури, улупнайи вахтназ Хирижв гъулаъ бицIидарин багъдин цIийи тикилишар дивбан ляхнар давам шула. Гьамусаьтна тикилишчйир чIатан терефнан ляхнар апIбиин машгъул ву. Тикилишчйирин гафариинди, бицIидарин багъ цIийи йисаз ляхник кипуз гьязур хьибди.