Умгьанат Сулейманова
Ихь уьлкейин жара шагьрар-районариъси, Дербент райондин, Дагъ. Огни ва Дербент шагьрарин мектебариъра 1-пи сентябриъ цIийи урхбан йис ккебгъбан сабпи зенгар гъивну. Думу шадлугъназ тялукь вуйи серенжемариъ узура иштирак гъахьунза ва мектебарин директорарихъди цIийи урхбан йис фици ккебгънуш, сюгьбат гъубхунза.
Дербент шагьрин 8-пи нумрайин мектебдин директор Радик Аьлибеговди чпи фици 1-пи сентябрихьна гьязур гъахьнуш, ктибтнийи.
«Ццийин урхбан йисан ич мектебдиъ 800 урхурайири аьгъювалар ва тербия гъадабгъиди, дурариз аьгъювалар ва тербия 60 мялимдикан ибарат вуйи мялимарин коллективди тувиди. Цци сабпи классдиъ сабпи ражари вуди 60 бицIир партйирихъ деъди. Китабарикан улхуруш, 1-4 пи классариъ урхурайидариз вари китабар а, хъа заан классариъ урхурайидариз саспи китабар гьуркIну адар. Багарихьди думу месэлара гьял хьибди. Улихьна йисари абйир-бабариз, бицIидар мектебдиз гьязур апIбан бадали гизаф читинвалар алахьури гъахьну. Аьхиримжи йисари бицIидариз вуйи пособйирин кьиматар за хьувал себеб вуди гизаф урхурайидар Аьгъюваларин йигъаз 1-пи сентябрь улубкьайиз хайлин вахт ккимиди гьязур хьуз хъюгъра. Гьаз гъапиш мектебдиз гъягъяйиз гъадагъру шей’ар гизаф шулу. Думу шей’ар масу гъадагъуз пулин дакьатарра цIиб ккундар. Улихьнаси дарди, гьамусяаьтна абйир-бабарин ва мектебдиъ лихурайи мялимарин сигъ аьлакьа а, гьаз гъапиш мектебдин программйир йигълан-йигъаз дигиш шула, ОГЭ ва ЕГЭ туврайи бицIидариз, аьхюдарин кюмек дару вахтна, читинди алабхъуру. Заан классари, урхурайидарин имтигьянар ккергъайиз мялимарин ва абйир-бабарин сар-сарин гъавриъ ахъувал, албагувал арайиъ айивалиин гизаф рази вуза», – къайд гъапIнийи директори.
Дагъ. Огни шагьриъ Мирзакеримов Абрик Аьгь-мадовичдин ччвурнахъ хъайи 7-пи нумрайин мектебдиъ директорвал апIури Хадижат Аскендеровайи хайлин йисар ву.
Мушваъ цIийи урхбан йис ккебгъбан сабпи зенг йивбан серенжемдиъ Дагъ. Огни шагьрин глава Замир Гьяжимурадов, РД-йин энергетикайин ва тарифарин министр Марат Шихялиев, Дагъ. Они шагьрин УО-йин начальник Людмила Насурова, СВО-йин иштиракчи ва Дербент шагьриъ военный комиссарин заместитель Ших Аьлиев, мялимвалин зегьметнан ветеран Саид Ризаев иштирак гъахьну. Дуфнайи хяларикан сабпи гаф министр Марат Шихялиевдиз тувнийи. Дугъу чан улхбаъ уч духьнайидар цIийи урхбан йисахъди тебрик гъапIну ва мектебдиз пешкеш вуди спортдин алатар тувну.
Шагьрин глава Замир Гьяжимурадовра удучIвну гъулхнийи. «Гъи му серенжемдиъ, му мектебдин аьгъюваларин ужагъдиъ гъазанмиш дапIнайи хъуркьувалар ачухъ апIурайи мектебдин директор Хадижат Аскендеровайихъ аьхю утканвалиинди хъпехъунза. Гьамци, гьарсар мектебдин директори цIийи урхбан йисан гъаншариъ чан улихь цIийи планар диври гъахьиш, гьелбетда, гьарсаб ляхниъ, дидихъ юкIв хъайиган, лихуз гьевес айиган, хъуркьуваларра арайиз гъюру. Му мектебдихьна вуйи гьюрмат йиз кьюб ражари артухъди вуйиз, гьаз гъапиш думу СВО-йиъ чан жан фида гъапIу игит эскер Мирзакеримов Абрик Аьгьмадовичдин ччвурнахъ хъайиб ву. Гьюрматлу мялимар ва баяр-шубар, ичв урхбан цIийи йис мубарак апIураза, учвуз хъуркьувалар, бахтар, ужувлар ккун апIураза», – натижа гъивнийи шагьрин мэри.
Шадвалин серенжем давам апIури, мектебдиъ урхурайидари, мяълийир гъапIнийи, шиърар гъурхнийи.
Дагъ. Огни шагьрин 3-пи нумрайин мектебдин директор Мелекниса Халибеговайи узуз туву мялуматариинди, гъубшу 2024-пи йисан 3-пи нумрайин мектеб аьгъювалар тувру идарйир цIийи алаъбан программайиинди дибдиан рас гъапIну.
– Гъубшу йисан му программайиинди ва Дагъ. Огни шагьрин руководствойин кюмекниинди мектебдин расвалин тялукь ляхнар кIули гъахуз мумкинвалар гъахьунчуз. Думу кюмекнакан гизаф шад вуча ва аьгъюваларинна тербияйин ляхин заан дережайиз за апIуз чалашмиш учура хьидича. Цци ич 3-пи нумрайин мектебдин партйирихъ 950 бицIидар деъну. Дурарикан 77 бицIир ккергъбан классариз гъафидар ву. ЦIийи урхбан йис ккебгъайиз, мектебдин дараматарин айитI ва чIатан терефнаъ жвилли ляхнар дапIну, марцци, аку классар баяр-шубар кьабул апIуз гьязур гъапIунча, – ктибтнийи Мелекниса Халибеговайи.
