Гюльнара Мягьямедова

Январин 10-пи йигъан Дагъустандиъ мектебариъ урхурайидарин Вариурусатдин олимпиадайин регионариъ гъабхру пай ккебгъну.

Мектебариъ урхурайидарин Вариурусатдин олимпиада – гьюкуматдин, муниципальный, гьюкуматдин дару образованиейин, уьмуми образованиейин программайихъди лихурайи тешкилатариъ урхурайидарин арайиъ жюрбежюр дарсариан гьар йисан гъабхурайи олимпиадайин гъурулуш ву. Урусатдин Федерацияйин вари субъектар иштирак шлу му серенжем юкьуб йишваз пай шула: сифте мектебариъ, хъа муниципалитетариъ, хъасин регионариъ гъабхуру, региондиъ гъалиб гъахьидар олимпиадайин аьхиримжи пайнаъ иштирак шулу.

Региондин олимпиада 22 предметдиан январин ва февралин вазари гъябгъиди. Дидиъ муниципалитетариъ гъалиб гъахьи, мектебарин 9-11-пи классариъ урхурайи 600 агъзуртIан артухъ баяр-шубар иштирак хьиди.

Региондин олимпиадайин пайнаъ гъалиб гъахьи баяр-шубар олимпиадайин аьхиримжи пайназ удучIвуру. Хъа уьлкейин дережайиъ гъалиб гъахьидар, гьюкуматдин ва муниципалитетарин заан пишекарвалин образованиейин заведенйириз имтигьянар тутрувди, кьабул апIуру.