Мейлан Нежефов

Улихьна йигъари Дагъустан Республикайин премьер-министр Аьбдулмуслим Аьбдулмуслимовди республикайин 49 мектебдин директорарихьна мектебдиъ урхурайидар гъахру цIийи автобусарин жюлгер тувну.

Гьадрарикан 2 автобус Хив райондизра ккуркьну – Хиварин ва Хирижв гъуларин кьялан мектебариз. Узу кьюбиб гъуларин мектебарин директорарихъдира сюгьбат гъубхнийза.

«Ич мектебдиъ айи машин, 10 йистIан артухъ дилибхну, йирси дубхьнайи. Мидин гьякьнаан абйирбабарик гизаф аьрзйир кади гъахьнийи, иллагьки заан мягьлайин ва Дулмакентдин агьалйирик. Сабпи классдилан юкьубпибдиина урхурайи баяр-шубар мектебдиз хьади гъюруб, ясана кьяляхъ хьади гъахруб кмикмиди гьацI рякъюъ чIур шуйи. Саб гафниинди, машин пайгарнакк ккадарди, гизаф манигъ’валар шули гъахьунчуз. Чухсагъул мялум апIураза сифтена-сифте абйир-бабариз. Ухьухь, диришу бализ никк тутрувур, кIури шулу. Сикин дарди, му месэла гьял хьайизкьан дурар кьялхъян хътакундайи. Гьелбетда, аферин месэла гьял апIуз чарйир гъагу гьякимаризра», – къайд гъапIнийи Хиварин кьялан мектебдин директор Физули Аьбдулязизовди.

Хирижв гъулан кьялан мектебдин директор Гьялимат Гьялимовайира цIийи транспорт тувбиин учв рази вуйивал ашкар гъапIну. «Гьамусдиз учухь мициб акв адайи. Ав, саб артухъ манзил адаршра, рякъ илипну дюзиб вушра, я йиф, я ригъ, я мархь дарпиди, Лик’арин гъул’ан учухьна 10-11-пи классариз урхуз гъюрайидарин язухъди вуйчуз. Я кас, сарун магьа 16 кас гъягъру ГАЗель машин дурарин гъайгъушнаъ хьибди. Гъит машин мянфяаьтлуди ишлетмиш апIуз сагъ’вал туври», – гъапнийи дугъу.