Гюльнара Мягьямедова 

Мектебдиз гъягъюрайи баяр-шубар, студентар, мялимар ва абйир-бабар! Ичв улубкьнайи цIийи урхбан йис мубарак ибшри.

Ухьу вари, варитIан аьхю машквразси гьязур духьну, фила-вуш сабпи ражари сабпи классдиз гъушдар вухьа, гьаддиз 1-пи сентябрь гьарсар касдин уьмриъ асас йигъ ву. Мектебдиз гъягъюрайидарин дарсар ккергъна, улихьна айи аьгъювалар давам апIру вахт улубкьна. Студентар илим аьгъю апIуз, цIийи пише гъадабгъюз рякъюъ учIвна. Мялимари чпиз айи аьгъювалар набалугъариз тувуз чарйир агура, дурарик илим аьгъю апIуз аьшкь капIра. Абйир-бабар кIуруш, чпин веледарин хъуркьувалариз ккилигура.
Гьаму йисан ихь республикайиъ 490 агъзуриинакьан бицIидар мектебариз гъягъиди, дурарикан 46 агъзур бицIир – сабпи классдиз.
Дагъустандиъ 1-пи сентябри хьуб цIийи мектебди чпин раккнар ачмиш гъапIну: Хасавюртдиъ 1150 урхурайириз ва Къизилюртдиъ 150 бицIириз йишв айи мектебар, Хасавюрт райондин Пятилетка кIуру гъулаъ 300 бицириз йишв айи, Байрамаулиъ – 604 бицIириз йишв айи ва Къарабудагъкент райондин Какамахи гъулаъ 220 урхурайириз йишв айи мектебар арццну.
1-пи сентябри Дербент шагьриъ 120 касдиз йишв айи бицIидарин багъра ачмиш гъапIну.

Республикайиъ аргъаж шулайи наслар вари терефарихъан артмиш апIбан бадали, ужудар шартIар арайиз хуб гьюкмин улихь дийигънайи месэлйирикан саб ву.