Наргиз Гюлечова
Сентябрин ваз улубкьайиз, абйир-бабар чпин веледар урхбан йисахьна гьязур апIури шулу. ВаритIан гизаф 1-пи сентябриз ккилигурайидар 1-пи ражари 1-пи классдиз гъягъюрайи бицIидар ву. Дурариз му вахт чпин уьмриъ гьаммишандиз кIваинди гъубзру варитIан асас вахт вуди гъубзру.
Мектебдиз гъягъюрайи баяр-шубари, иллагьки 1-пи классдиз бицIидар гьаърайи абйир-бабари чпин веледариз шей’ар масу гъадагъруган, сабпи нубатнаъди бицIириз рягьятвал кади алабхьуз шлу мутму гъадабгъуру. Мидиз аьксина вуди, гъи мектебариъ бицIи классариз туврайи китабар гъагъидар ва аьхюдар ву. Дицдар китабар чантайиъди гъахузра бицIириз читинди шулу, дугъан юкьян гьаризра гъагъиди алабхъуру. Гьаддиз, абйир-бабари чпин бицIириз аьзият ктарди гъабхуз шлу чанта гъадабгъуз чалишмиш шула. Гъи дицдар чантйирин кьимат, исккан гьисаб, 5 агъзур манат ву.
Мектебдиз веледар фици гьязур апIураш, дурариз фукьан харжар удучIвураш, веледарин дадйирихъди гаф-чIал гъапIунза.
Каспийск шагьриан вуйи Земфирайин гьамус 2 велед мектебдиз гъягъюра. Риш 6-пи классдиз удучIвна, хъа бай кIуруш, 1-пи классдиз гъягъюз мектебдик каъна.
«Дюзди кIуруш, риш 1-пи классдиз гьаъру вахтнатIан, гъи бай гьаърайиган удучIвурайи харжарин кьадар саки 3 ражари артухъ гъахьниз. Сабпи классдиз гъягъюрайи бицIириз лазим вуйиб вари жвуву гъадагъуб алабхъура: ликрилан кIул’ина алабхьру кьюб жар палатси, мектебдиъ ишлетмиш апIру дафтрарна, кьалмарна, ручкйирра ва гь.ж. Гъадагъурайи шей’ар бицIи-бицIиди вушра, удучIвурайи харжарин кьадар аьхюб ву. Гьелелиг лазим вуйиб вари гъадабгънура адариз, хъа вушра сар бицIириз 35 арзуртIар артухъ харж дубхьнайиз», — ктибтурайи бицIирин дадайи.
Хъа Мягьячгъалайиан вуйи Ренатайин 4 велед а. Гьадрарикан цци аьхюну риш медицинайин колледждик каъна, хъа имбуну шубрид веледар мектебдиз гъягъюра. Цци бицIинурсир байра 1-пи классдик ккаъну.
Ренатайи мялум гъапIганси, колледждин 1-пи курснак каънайи шуразтIан, 1-пи классдиз гьаърайи бализ удучIвурайи харжар гизаф шула.
«Гьеле йиз 3-пи классдиз гъягъюрайи байра айиз. Дугъаз бицIи гъахьи палтар гъузнашра, фици вушра цIийи палтарра гъадагъунза.
Янаки, юкьрид веледаризра алахьру палтарси, урхбаъ лазим шлу шей’арра гъадагъуз гьамусдиз 80 агъзурихьнакьан харж гъабхьнийиз. Гьелелиг, китабар фицдар гъадагъну ккундуш, дупнадар. Китабарра кади, 100 агъзур удубчIврубдиин инанмиш вуза», — кIура Ренатайи.
Дарпиди гъибтуз шулдар. Магьа аьхиримжи йисари 17 йис’ина яшар духьнайи веледар ади, касабвал кайи хизанариз гьюкуматдин терефнаан кюмек апIура. Гьарсар веледдиз 15600 манат тувра. Мектебдиъ урхурайи бицIидар айи хизанариз му аьхю кюмек ву. Мисал вуди гъадабгъиш, кьялан гьисабариинди, алабхьру палат ктарди, мектебдиъ лазим вуйи канцелярияйиз саки 8 агъзур манатдихьна харж удубчIвура. Му кьадар сачтIан 7-8% за дубхьна. Дафтрариин иливру жилдрарилан гъадабгъну, вари мутмйир багьа гъахьну. Гьаддиз, удучIвурайи харжарин кьадарра лап аьхюб дубхьна.
