Мейлан Нежефов
6-пи майди Хив райондин депутатарин сессияйин къарарниинди Ляхлаарин кьялан мектебдиз шаир, мялим ва жямяаьтлугъ кас Керим (Маллакерим) Маллаевдин ччвур тувну.
Керим Маллаев 1948-пи йисан Хив райондин Ляхла гъулаъ бабкан гъахьну. Багъри гъулаъ мектеб ккудубкIбалан кьяляхъ думу 1964-пи йисан Дербент шагьриъ педучилищейик урхуз кучIвру. Жигьил мялим Табасаран райондин Дарвгъарин ва Рушвларин мектебариъ бицIи классарин мялимди лихуру. Армияйин жергйириъ чан эскервалин буржира тамам дапIну, дугъу 1976-пи йисан заан образование Ставрополин педагогвалин институтдин тарихи факультетдиъ гъадабгъуру. 1971-пи йисланмина 2021-пи йисаз чан уьмрин аьхиримжи йигъаризкьан, заан дережайин категория ади, Керим Маллаевди мялимвал апIури гъахьну. Думу багъри гъулан мектебдиъ сифте бицIи классарин мялимди, хъа аьхюну пионервожатыйди, хъасин тарихдин ва обществознаниейин дарсарин мялимди, саб вахтна директорди лихури гъахьну.
Дагъустандин лайикьлу мялим Керим Маллаевди хайлин йисари Хив райондин ТОКС-диз регьбервалра тувну. Дугъан ва дугъахь аьгъювалар гъадагъурайи баяр-шубарин гьунарниинди шил адарди Ватандин Аьхю дявдиъ гъудургу варждилан зиина табасаран ва дагъустанлу эскрар кивнайи йишвар ахтармиш дапIна. ТОКС-дин терефнаан Урусатди гъахурайи вари конкурсариъ аьхю аьшкьниинди иштирак шули, дугъахь урхури гъахьидари мектебдиз ва райондиз йицIбариинди сабпи йишвар духна. Гьаму вари йисари гъабхурайи баркаллу ляхин гьисабназ гъадабгъну, Керим Маллаев 2008-пи йисан «Урусатдин ватандаш» медалиинди лишанлу гъапIнийи.
Керим Агъакеримовичди багъри гъулан мектебдиъ уч дапIнайи музейиъ агъзурилан зиина экспонатар а. Хъа гъи райондиз гъюрайи туристарин маршрутдин пландиъ му музейи чан хусуси йишв бисура.
Шаирин сабпи эсерар «Октябрин акв» газатдиъ чап апIури гъахьну. Дугъан шиърар ва макьалйир «Аку хяд», «Табасарандин нурар», «Дагъустандин мялим» газатариъ, «Дагъустандин дишагьли», «Ппази», «Табасарандин литература», «Литературайин альманах» журналариъ чап дапIна. Шаирин кIул’инди вуйи «Хьадукран гьалав» китаб 2000-пи йисан удубчIвуру. Гьаддихъанмина «Уьмрин девлет» (2008), «Ригъ ва юкIв» (2009), «Гележег бадали» (2011), «Гьунарар ва наградйир» (2018), «ТIурччвура микIлу кIажар» (2019), «Ляхла ва ляхлаар» (2019)чапдиан адапIну.
Гъи дугъан веледарира табасаран литература ва культура артмиш апIбак лайикьлу пай кивра: риш Гюльмира табасаран халкьдин мяълийирин устад, бай Физули РД-йин культурайин лайикьлу гъуллугъчи, Табасаран драмтеатрин актер, тмуну бай Ферудин багъри гъулан СДК-йин директор, мектебдиъ музыка дарсарин мялим, хъа гьамус, ТОКС-дин ва музейин руководителдира лихура.
Мярака мектебдин директор Вадим Межидовди кIули гъубхнийи.
Шадлугънан мяракайиъ гъулан агьалйир, кючюрмиш шулайи деврин литературайин шаирар Шюшеханум Керимова, Аьбдурягьим Аьбдурягьманов, Табасаран драмтеатрин директор Аьлимурад Аьлимурадов, райондин культурайин отделин кIул Казбек Къазиев, депутатарин корпусдин председатель Садикь Исрафилов, райондин образованиейин отделин сарпи заместитель Азадин Юсуфов, СВО-йин иштиракчи, «Ахмат» батальондин командирин заместитель, капитан Замир Гьяжимурадов, шаирин хизанар ва бикIбахьна гьякь-гьюрмат айи ярар-дустар иштирак гъахьнийи.
Гьарсар удучIвну улхурайири шаири чалантина гъибту литературайин ирснакан, ярар-дустарик юкIв капIру дугъан хуш-зарафатнакан, гьарган инчI кади, ригъдиси манишин туврайи суратнакан, жара касдин сумчир ва салам жвуванубси гьисс апIру жумартваликан ктибтнийи.
Мектебдиз лайикьлу касдин ччвур тувнайиб уч духьнайидарин мани ва кIваз хуш вуйи гафар-чIалариан мялум шулайи. Гъит цIийи ччвурнахъди ляхлаарин аьгъюваларин ужагъдиз хъана заан хъуркьувалар ишри!
