Зубайдат Шябанова

Сабпи сентябри Табасаран райондиъ образованиейин 57 идарайиъ Аьгъюваларин йигъаз тялукь дапIнайи яркьу серенжемар гъахьну. Му йигъан райондин 7597 ученик мектебариз гъушну. Дурарикан 590 бицIири сабпи классдиз сабпи гам алдабгъну.

Думу йигъан Табасаран райондин глава Мягьямед Къурбанов ва РД-йин Халкьдин Собраниейин депутат Алавудин Мирзабалаев Хючна гъулан 1-пи нумрайин лицейиъ ва Хючна гъулан 2-пи нумрайин мектебдиъ гъягъюрайи шадлугънан серенжемариъ иштирак гъахьну.

«1-пи сентябрь му сабдихьра тевуз даршлу, гьарсар касдин кIваъ гъубзру, гьевеслу гьиссари, шадвалин ва цIийи умудари юкIв абцIнайи машквар ву. Ученикариз думу асас хусуси мяна айиб ву: сабпи классдиз гъюрайидариз аьгъюваларин макандиз маракьлу сейир, выпускникариз гележегдин уьмрихьна жавабдарвалиинди янашмиш хьувал, хъа мялимаризна абйир-бабариз сатIи вуйи ляхниъ ва тербияйиъ цIийи девир шула.

Гъи мектебариъ урхурайидарилан Табасаран райондин, Дагъустандин, Урусатдин гележег ва арбаб артмиш’вал асиллу ву. Гьаддиз бицIидари гьарсаб йигъ, шлубкьан артухъ аьгъювалар гъадагъури гьапIну ккунду. Аьгъювалар адарш, артмиш’валарра шлуб дар.

Аьхю гьюрматниинди бицIидариз аьгъювалар ва тербия туврайи мялимарихьна янашмиш шулаза. Учву гъабхурайи баркаллу ляхниз аферин!», — гъапну Мягьямед Къурбановди райондин баяр-шубар ва мялимар улубкьу цIийи урхбан йисахъди тебрик апIури.