Урусатдин чап апIбарин йигъ 1991-пи йисхъанмина 13-пи январиъ къайд апIура. Думу йигъ 1703-пи йисан Петр Сарпирин указдиинди Урусатдиъ чапдиан сабпи газат удубчIву йигъа-хъди аьлакьалу ву.

Гьаму йисан Урусатдин чап апIбарин йигъ «Табасарандин нурар» газатдин редакцияйин коллективди улихьнаси аьшкьниинди къайд апIурадар. Саб гъапиб, вари уьлкейизси, редакция-йизра ккудубшу йис читинуб гъабхьну. Учу саки гьарсаб нумрайиъ Урусатди гъабхурайи хусуси метлеб айи дявдин операцияйиъ иштирак шулайи ихь эскрарикан, дурарин хъуркьуваларикан ва пашман дюшюшарикан бикIуз мажбур гъахьунчу.

Гъи Израили Сектор Гъазайиъ кIули гъахурайи дявдин гьяракатарин натижайиъ жюрбежюр тешкилатарин улупбариинди, агъзрариинди саламат инсанарихъди сабси, 65-рилан 89-ина журналистарра гъийихну. Хусуси метлеб айи дявдин операция-йи 4 журналист гъийихну. Му улупбари дявйир гъахбаъ тасдикь дапIнайи къайдйир, гьадму гьисабнаан журналистар йивуз гъадагъа вуйивал, батIул апIурайиваликан кIура.

Сабсан учук гъалаб кипрайи себеб йислан йисаз «Табасарандин нурар» газатдин тираж ис абхърайивал ву. Гьамусяаьт тялукь адресариз вуйи ва газат урхрудари чпин аьшкьниинди апIурайи подпискайин кьадар 1200-тIан дар. Имбунуб учу, мюгьлет айи касарихьна гъягъюри, тIалаб ва миннатар апIури, арайиз хурайиб ву. Му саягъ дигиш дархьиш ихь газат хъябкьювалихьнара цIибтIан манзил гъубзридар.
Учу подпискайиин фукьан зегьмет гъизигишра, ихь ватанагьлийириз газат подписка апIуз ккунди адар. Бязи гъунши миллетарин вакиларин милли прессайихьна вуйи янашмиш’вал ихь халкьдин бабан чIалниинди удучIвурайи газатарихьна, журналарихьна вуйи рафтарарихъди тевиш, кIулизра пашман фикрарра гъюру.
Газатдин гьюрматлу дустар! Эгер учву 2023-пи йисан аьхириз газат подписка апIуз хъуркьундарш, гьамусра кьан дубхьнадар. Подписка апIуз магьарханай. Бабан чIалниинди гьяфтайиъ саб ражари вушра газат урхуз мумкинвалихъ жвув мягьрум мапIанай!