Умгьанат Сулейманова

 
Гьар йисан Урусатдин меркездин Уьру майдандиин, мектеб ккудубкIу баяр-шубарин выпускной бал тешкил апIуру. Дина, гьелбетда, заан кьиматариз мектеб ккудубкIдариз, жюрбежюр дережйирин олимпиадйириъ, илмин конкурсариъ гъалиб гъахьидариз, СВО-йиъ иштирак шулайидарин бицIидариз ва гь.ж. теклиф апIуру.

Цци думу балиъ Дербент шагьриъ М.В. Абраменкойин ччвурнахъ хъайи 18-пи нумрайин гимназияйиъ урхури гъахьи Сабина Асланбековара (шиклиъ) иштирак гъахьну. Сабинайиз дициб мумкинвал фици кьисмат гъабхьнуш, узуз дугъан классный руководитель Эльвира Мириевайи ктибтну.

 
– Йиз классдиъ 33 баяр-шубари урхура. Дурарикан урчIвури гъизилин медализ мектеб ккудубкIну. Дупну ккундуки, выпускникарин балиъ 6 агъзуркьан жигьилар иштирак гъахьну, гьелбетда, дурарин арайиъ узухь урхури гъахьи риш иштирак хьуб аьхю хъуркьувалси гьисаб апIураза. 

Июнь вазлин аьхириъ Дербент шагьрин образованиейин управлениейин вакили узуз зенг дапIну, увухь урхурайи Сабина Асланбековайиз Урусатдин меркездин Уьру майдандиин тешкил дапIнайи выпускной бализ теклиф а, гъапнийи. Сабинайиз думу «бахтлу билет» давди кьисмат гъабхьиб дар. Саб кIуруб, дугъу мектеб гъизилин медализ ккудубкIну, ЕГЭ ужуйи тувну, 230 бал гъадагъну; кьюб кIуруб, думу гизаф веледар айи хизандиан ву. Дидланра савайи, дугъан адаш Аьзиз Асланбеков СВО-йин иштиракчи ву. Гьаму вари терефар гьисабназ гъадагъну, Сабинайиз Москвайиз теклиф гъапIну.

 
Сабина бицIи вахтнахъанмина дарсар урхбахъ, фунуб жара ляхнихъра юкIв хъайир ву. Мектебдиъ думу гьаммишан шагьрин ва республикайин дережайин олимпиадйириъ иштирак шули гъахьну. Шуран хизандикан кIуруш, Сабина кьюрпи бицIир ву. Дугъаз сар чи ва кьюр чве а. Аьхюну чи Аьишайи, заан аьгъювалариинди мектеб ккудубкIну, Астрахандиъ медицинайин университетдин шубубпи курснаъ урхура. Сабина учвра Москвайиъ медуниверситетдик кучIвуз гьязур шула. Чвйир бицIидар ву, Уьмари 6-пи классдиъ урхура, думура отличник ву. Хъа Уьсман гьелелиг бицIидарин багъдиз гъягъюра.

 
Сабинайин адаш Аьзиздиз ва дада Эльнарайиз аьхю вуйи чухсагъул, гьамцдар бажаранлу бицIидар тербияламиш апIбаз. Мицисдар хизанар ва бицIидар ухьуз артухъ ишри, – гъапнийи Эльвира Мириевайи.