Гюльнара Мягьямедова
Гьаму йигъари Табасаран райондин Жулжагъ, Хянягъ, Зил ва ТIивак гъуларин мектебариъ хусуси метлеб айи дявдин операцияйиъ гъийиху эскрариз дурар кIваинди уьрхбан тахтйир ачмиш гъапIну.
Жулжагъ гъулан серенжем кьюр игитриз бахш дапIнайиб вуйи. Кьулиф гъулан агьали Зиявудин Мягьямедханов, 2024-пи йисан чан хушниинди фронтдиз душну, гьадму йисан 16-пи майди чан эскервалин буржи тамам апIури гъакIнийи. Жулжагъ гъул’ан вуйи Рашид Мягьямадханов 2023-пи йисан чан хушниинди фронтдиз душну, Ватан уьбхюри 2024-пи йисан 18-пи июли гъакIнийи.
Йихбан кьяляхъ эскрар лишанлу гъапIу Кьягьялвалин орденар дурарин хизанарихьна тувнийи. Райондин газатдин кIулин редактор Имираслан Ярялиевди муниципалитетдин кIулиъ айи Мягьямед Къурбановдин терефнаан текелиф капIнийи. Дугъу аргъаж шулайи наслиз ватанпервервалин тербия тувбан важиблуваликан гъапнийи.
Хянгъярин кьялан мектебдиъ хусуси метлеб айи дявдин операцияйиъ гъакIи Анвер Аьлибеговдиз кIваинди уьрхбан тахта ачмиш гъапIну. Серенжемдиъ эскрин багахьлуйир, мектебдин мялимар, урхурайидар ва гьацира Табасаран райондин администрацияйин главайин заместитель Ринат Мирзабалаев иштирак гъахьну.
Анвер Аьлибегов 2024-пи йисан 1-пи сентябри чан хушниинди фронтдиз душну, гьадму йисан 5-пи октябри Луганскдинна Донецкдин терефнаъ гъуллугънан буржи тамам апIури гъакIну.
Мектебдин директор Бахтияр Ражабовди серенжемдиъ гъапиганси, Ватан гъюбхдарин гьюрмат, тахтайикси, гъуландарин ва мектебдиъ урхурайидарин кIваъра гъубзди.
– Ич мектебдиъ кIваинди уьрхбан тахтйир ачмиш апIуб насларин арайиъ айи аьлакьайин лишан ву. Анверин игитвали аргъаж шулайи наслариз Ватан ккун апIуз, думу уьбхюз гьарган гьязурди гъузуз улупура, – гъапну Бахтияр Ражабовди.
Ринат Мирзабалаевди райондин глава Мягьямед Къурбановдин терефнаан абйир-бабариз текелиф капIнийи ва лайикьлу бай тербияламиш апIбаз чухсагъул гъапнийи.
Къайд апIуб лазим вуки, гьамус Хянгъярин кьялан мектебдин цалик гьамцдар 7 тахта ка. Дурар вари гьаму мектеб ккудубкIу ва Ватандин ихтиярар уьрхюри гъийиху эскрариз бахш дапIнайидар ву.
