Гюльнара Мягьямедова
Урусатдин Федерацияйин Президент Владимир Путинди уьлкейин оборона мюгькам апIбаз ва гъабхурайи гъуллугънаъ лишанлу хьувализ дилигну, Урусатдин Игит, Урусатдин оборонайин министерствойин гъураматдин кьушмарин кIулин командующийин заместитель, ихь ватанагьли, генерал-полковник Рустам Мурадовдиз Гьюрматнан грамота тувну.
Рустам Мурадов Табасаран райондин Ханак гъулан вакил ву. Дугъу Санкт-Петербургдин уьмуми кьушмарин заан командный училище, РФ-дин Яракьлу Кувватарин уьмуми кьушмарин академия, РФ-дин Яракьлу Кьувватарин Генеральный штабдин военный академия ккудубкIну. Взводдин командирилан хъюгъну, уьмуми кьушмарин армияйин командующийин гъуллугъниинакьан удучIвну. Швнубна саб ражари Кафари Кавказдин региондиъ бандитарин гьяракатарин ляхнар терг апIру хусуси метлеб айи операцйириъ иштирак гъахьну.
2015-пи йисхъанмина Р.Мурадов Новосибирскдиъ уьмуми кьушмарин 41-пи армияйин штабдин начальникдин сарпи заместителди лихури гъахьну. 2017-пи йисан декабрихъанмина Самарайиъ Кьялан военный округдин Уьру пайдгъин гвардейский кьюбпи армияйин командующийди гъилихну. Рустам Мурадов Сирияйиъ варихалкьарин террориствалин Урусатдиъ гъадагъа дапIнайи тешкилатариз аькси вуйи дявдин операцияйиъ РФ-дин Яракьлу Кьувватарин дестейин дахилнаъди иштирак гъахьну.
2018-пи йисан декабрин вазли Кьибла военный округдин командующийин заместителди тяйин гъапIну.
2020-пи йисан ноябрин вазлихъан 2021-пи йисан сентябрин вазлизкьан Дагълу Къарабахдиъ айи Урусат Федерацияйин Яракьлу Кьувватарин кьушмарин дестейин командующийди гъахьну. Урусатдин Ислягьвал дебккру контингент Дагълу Къарабахдин гъалмагъал арайиз дуфнайи жилариин ерлемиш дубхьну гъабхьнийи.
2022-пи йисан Рустам Мурадов Ригъ гьудубчIвру терефнан военный округдин командующийди тяйин гъапIну. Думу Украинайиъ гъабхурайи хусуси метлеб айи дявдин операцияйиз регьбервал тувру заан офицерарикан сар ву. Урусатдин кьушмарин «Восток» дестейин командующий ву.
Гъуллугънан буржи тамам апIруган кьягьялвал, дирбаш’вал улупбаз, жан гьяйиф дарапIбаз дилигну, 2017-пи йисан Рустам Мурадов Урусатдин Федерацияйин Игит ччвурназ лайикьлу гъахьну. Дугъаз «Ватандин улихь лишанлу хьпаз» II дережайин, III дережайин ва гъилинжар кайи IV дережайин орденар, Александр Невскийин орден, Кьягьялвалин кьюб орден, «Дявдин хъуркьувалариз лигру» орден ва хайлин медалар тувна.
Ихь ватангьли Рустам Мурадов ватанпервервалин, кьягьялвалин, намуслувалин чешне ву. Думу табасаран халкьдин арайиан вуйи сарпи Урусатдин Игит гъахьну. Рустам Мурадовди табасаран халкь машгьур гъапIну, дугъу Урусатдин Федерацияйин военный тарихдиъ лайикьлу йишв гъибисну.
РД-йин Счетный палатайин председателин заместитель Темирлан Расуловдиз гизаф йисари баркаллу зегьмет зигбаз ва Дагъустан Республикайин улихь лишанлу хьпаз Дагъустан Республикайин III дережайин Гьюрматнан орден тувну.
Дагъустан Республикайин лайикьлу экономист Темирлан Расулов Табасаран райондин Хюряхъ гъулаъ бабкан гъахьну. Дугъу Дагъустандин гьюкуматдин университетдин юридический факультет, Гьюкуматдин гъуллугънан кафари Кавказдин академия, Дагъустандин гьюкуматдин халкьдин мяишатдин университет ва Урусатдин Федерацияйин гьюкуматдин Счетный палатайин системный анализдин илимдинна ахтармишарин институтдин аспирантура ккудубкIну.
1989-1999-пи йисари гьюкуматдин органарин идара апIбан жюрбежюр гъуллугъариъ гъилихну. 1999-2003-пи йисари думу Дагъустан Республикайин Халкьдин Собраниейин депутатди ктагъну. Темирлан Расулов Дагъустан Республикайин Халкьдин Собраниейин бюджетдин, финансарин ва налогарин комитетдиъ пишекарвалин бинайиинди лихури гъахьну.
2003-пи йисан Счетный палатайин аудиторди тяйин гъапIну, 2008-пи ва 2013-пи йисари хъана гьадму гъуллугъниина ктагъну.
2013-пи йисан 16-пи декабри, конкурсдин натижйириз дилигну, Дагъустан Республикайин Президентди тяйин дапIнайи РД-йин идара апIбан кадрйирин резервдиз кьабул гъапIну.
2015-пи йисан октябрин вазли РД-йин финансарин министрин сарпи заместителди тяйин гъапIну.
2017-пи йисан мартди РД-йин Счетный палатайин аудиторди, хъа 2019-пи йисан 7-пи мартди Дагъустан Республикайин Счетный палатайин председателин заместителди дерккну.
РД-йин Глава Сергей Меликовдин указниинди табасаран чIалниинди удубчIвурайи «Дагъустандин дишагьли» журналин редактор, Дагъустандин писателарин Союздин табасаран секцияйин кIулиъ айи Сувайнат Кюребеговайиз «Дагъустандин халкьдин шаир» кIуру гьюрматлу ччвур тувну.
Сувайнат Кюребегова ихь халкьдин машгьур вакил ву. Думу Табасаран райондин Ужихъ гъулаъ бабкан гъахьну. Шуран шаирвалин бажаранвал мектебдиъ урхури имиди ачмиш гъабхьну. Дугъу чан сабпи шиърар «Табасарандин нурар» газатдиъ чап апIуз хъюгъну. Мектеб ккудубкIбан кьяляхъ Сувайнат Избербаш шагьрин педагогвалин училищейин музыкайин отделениейик урхуз кучIвну, думу хъуркьувалариинди ккудубкIну, хайлин йисари Хив райондин Гъвандикк гъулаъ музыкайин дарсар киври, мялимди гъилихну. Чан образование Дагъустандин гьюкуматдин педагогвалин институтдин филологияйин факультетдиъ давам гъапIну.
Сувайнат Кюребеговайи, культурайин жара вакилариси, ихь халкьдин ирс уьбхбак жвуванра лайикьлу пай кивра. Думу жюрбежюр конкурсарин гъалибчи, табасаран халкьдин арайиъ гъягъюрайи серенжемарин тешкилатчи ва ужур иштиракчи ву. Гъийин йигъаз дугъан шиърарин ва прозайин 7 китаб чапдиан удучIвна. «Гюзгйирин кьяляхъ» ччвур тувнайи чан китабдиъ Сувайнат Кюребеговайи «КкадабцIу бегьер дадмиш апIрур адарш, думу убзбан мянара адар» кIуру гафар тувна. Дугъан шиърар, дугъан жара эсерар халкьди урхура, гьюкуматдин терефнаанра фикир дарди гъитнадар.
Ихь ватанагьлийир чпин наградйирихъди тебрик апIури, дурариз жандин мюгькам сагъвал, хушбахтлу уьмур, ляхниъ заан хъуркьувалар ккун апIурача. Ичв хъуркьуваларикан газатдиъ чап апIуз гьаммишан шад вуча.
