Мейлан Нежефов
27-пи августди Хив райондин Культурайинна эрг’вал йивбан хулаъ улубкьурайи цIийи урхбан йисан гъаншариъ мялимарин августдин конференция кIули гъубхну.
Му серенжемдиъ райондин глава Ярмет Ярметов, образованиейин отделин кIулиъ айи Назаряли Тарланов, муниципалитетдин «Сарпидарин гьяракатнан» координатор Рауф Аьгьмедов, методкабинетдин гъуллугъчи Марат Межидов ва Мажвгларин уьмуми мектебдин директорин тербияйин ляхнариз лигру заместитель Мейлан Нежефов удучIвну гъулхнийи. Чпин улхбариъ дурари, аргъаж шулайи наслиз тербия ва аьгъювалар туврайи райондин мялимариз чухсагъул мялум апIбан мани ва кIваз хуш шлу гафарилан ккебгъну, ккудубшу йисандин ГИА-йин натижйир йивури, гьамус тазади образованиейин цирклин улихь дийигънайи месэлйирикан ва дурар гьял апIру рякъярикан ктибтнийи.
«Гьякь мялим вуйивалиан аьгъязуз: Саб техникайира аьсрариинди халис мялим ву пуз шлу касдин хилиъ айи мел, доска ва ччапп дигиш апIдар. Хъа уьмрин имбу тIалабари образование гьарган сабйишв’ин ва сабси гъибтри адар. Ухьуз мялум вуйиганси, гьар йисан шулайи дигиш’валариина ццира аьлава дигиш’валар хьиди. Гьадрарикан саб, ихь республикайин имбу мектебарси, ухьура МЭШ-диина улдучIвурайивал ву. Ав, саб яш дубхьнайи мялимариз ццийин йисаъ гьии даруваларра алахьиди. Амма хъугъай, узура дидиз тамаша гъапIунза. Мектебариъ дарсарихьна духьнайи деврин тIалабариз жаваб шлудар вари гьадушваъ гьуркIну тувра. Гьарсаб дарснан китаб, дарснахьна вуйи план, презентация, урхурайидариз хулаз тувру ляхин душваъ вари гьязурди улупна. Анжагъ ухьуз гъубзрайиб ихь ляхниъ думу мянфяаьтлуди ишлетмиш апIубтIан дар. Гьелбетда, Москвайиъси, ихь мектебариъ вари хъайи-хъайибси адрубдин, гьаци маважибра дарубдин гъавриъ ахьа. Хъа мидин тахсир ухьуз урхурайи баяр-шубаринуб рябкъну ккундар. Дурар ухьухьна цIийи урхбан йисан марцци фикрариинди, кархьнайи улариинди гъюра. Дурарин кIвак йивуз ухьхьан даршул. Гьарсар халис мялимдин мурад-метлеб гьадму вуки, чахь агъювалар гъадагъурайи гъийин цIюмгъял, закур чавтIан саб дережайин за духьну, чав алахъган дугъкан «киву дарсназ чухсагъул, мялим» кIуру ватанпервер ктучIвуб. Гьаддиз мялимвалин ччвур ихь арайиъ гьюрматлуди ва фагьмиъ марцциди уьбхбаз чарйир зигидихьа. Алахьурайи читинвалариз дилигди, йис ягъурлуди гъарабхри, аьзиз дустар!» – гъапнийи райондиз регьбервал туврайи Ярмет Ярметовди.
Конференцияйин аьхириъ хайлин йисари баркаллу ляхин апIурайи, ккудубкIу урхбан йис заан хъуркьувалар ади ккудубку ва гьацира, ГИА-йин заан баллар гъадагъу баяр-шубариз дарс киву йицIиюкьур мялим РФ-дин мярифатнан министерствойин терефнаан «Урусатдин образованиейин цирклин гьюрматлу гъуллугъчи», кIуру ччвурнан сагьибар хьуб тебрик гъапIнийи.
