Умгьанат Сулейманова

Улихьна йигъари Табасаран райондин «Йисандин мялим – 2024» муниципальный конкурс кIули гъубшну. Йисандин конкурс кIули гъабхбан метлеб райондин мектебариъ лихурайи мялимарин пишекарвалин дережа фициб гьялнаъ аш, ашкар апIуб вуйи.

Думу конкурсдиъ иштирак гъахьи йицIимиржир мялимдикан гьарури чаз айи аьгъювалар ва тажруба тамамвалиинди улупну. Финалиъ чешнелу дарсар гъахбан конкурсдиъ йирхьур мялимди заан баллар гъазанмиш гъапIнийи. Сабпи йишв Наида Къулиевайи (Хючнаарин 2-пи мектебдиъ ккергъбан классарин мялим), кьюбпи йишв Маида Саидовайи (Табасаран райондин гимназияйин тарихдин мялим), шубубпи йишв Севиль Джабаевайи (Ярсарин кьялан мектебдин математикайин мялим) гъадагъну.
Сабпи йишв гъадабгъу мялимдикан жикъиди ктибтидиза.

Наида Сефербеговна Къулиевайин, Дербент шагьриъ ерлешмиш дубхьнайи педагогический колледж ккудубкIну, ккергъбан классарин мялимди лихури 17 йис ву.
«Узу му конкурсдиъ иштирак хьпан метлеб йиз сяняаьтчивалин устадвал ахтармиш апIуб вуйиз. Мицисдар конкурсар кми-кмиди кIули гъахури, мялимари чпиз айи ляхнин тажруба сар-сарихьна рубкьури гъахьиш, фунуб ляхинра улихь гъябгъиди. Райондиъ гъягъру жюрбежюр конкурсариъ иштирак гъахьунза. Мялимвал йиз бицIи вахтнахъанмина юкIв хъайи пише вуйиз. Узу дарс киврайи бицIидара, маншаллагь, мектебдин фуну серенжем гъабхьишра иштирак шули, улихь хьайидар ву. Дарс бицIириз аьгъдар кIуру гаф мялимди саб вахтнара дупну ккундар. Мектебдиъ зигьимсуз бицIидар айиб дар, чпизкьан бажаранвал кайидар гизаф а. Гьарсар бицIирихьна вуйи рякъ дабгну, дугъахъди дюзди ляхин дапIну ккунду. БицIидарин уьмрин асас вуйи шибритI ипурайидар ккергъбан классарин мялимар ву. Гьаци вуйиган учу, ккергъбан классарин мялимари, аьхю зегьмет зигну ккунду», – гъапнийи Наида Къулиевайи.

Газатдин редакцияйин терефнаан Табасаран райондин «Йисандин мялим – 2024» муниципалин конкурсдиъ иштирак духьну, заан баллариз лайикьлу гъахьи мялимариз гележегдиъра чпин юкIв хъайи ляхниъ хъуркьувалар ккун апIураза.