Зубайдат Шябанова
Гъябгъюрайи йисан Табасаран райондиъ мектебарин олимпиадйириъ 4-11-пи классариъ урхурайи 8643 бицIир мектебарин этапдиъ, хъа 1487 биц1ир муниципальный дережайин пайнаъ иштирак гъахьну. Олимпиадйирин натижйириинди республикайин дережайиъ иштирак хьуз 19 урхурайир гъядягъну. Думу урхурайидарин арайиъ айи Эфруз Базутовайи хьуб предметдиан сабпи йишвар гъазанмиш гъапIну. Хъа гьаму йигъари думу инглис чIалнаан республикайин дережайин олимпиадайиъра гъалиб гъахьну. Конкурсдин кьяляхъ узу Эфруздихъди сюгьбат гъубхнийза.
Эфруз Базутова Жулжагъ гъул’ан ву, гьамусяаьт 10-пи классдиъ урхура. Сабпи классдианмина думу мектебдиъ анжагъ заан аьгъювалариз урхурайир ву. Хъа 7-пи классдиан башламиш дапIну, Эфрузди райондин дережайин талитариъ инглис чIалнаан гьарган сабпи йишвар гъадагъура. Цци бажаранлу шуру райондин олимпиадйириъ обществознаниейиан, экономикайиан, математикайиан, инглис чIалнаан ва право предметариан сабпи йишвар гъазанмиш гъапIну.
Мектебдин кьяляхъ Эфрузди юридический цирклиан вуйи аьгъювалар тувру институтдиз гъягъюз ният дапIна. Дугъу юридический пишекарвал ктабгъбазра чан себебар а. Асас вуди сюгьбатнаъ шуру чпиз обществознаниейиан дарсар киврайи бажаранлу мялим Аьлимягьямад Байрамбегович Аьшурбеговдикан аьшкьниинди ктибтури гъахьну. Думу мялимдин дарсар кивбан къайда асуллагь жарадаринубсиб дар. Дугъан урхурайидарихьна вуйи рафтари ва тувру аьгъювалари Эфруздиз юридический ва экономический рякъ ктабгъуз тясир гъапIну.
Мидланна гъайри, Эфрузди инглис чIалнаан аьгъювалар гъадагъубра дипудар. Шуран гафариинди, иллагьки гъийин девриъ инсанарин уьмриъ инглис чIал аьгъювали аьхю роль уйнамиш апIура.
Къайд дапIну ккундуки, Эфруздин адаш Казбек ва дада Флора Жулжагъ гъулан инглис чIал кивру мялимар ву. Адаш ва дада муниципальный дережайиъ кIули гъягъюри гъахьи харижи чIаларин «ВаритIан ужур мялим» конкурсариъ швнуд-сад йисан гъалиб шули гъахьнийи. Хъа Эфруздин аьхю аба Базут Базутовра инглис чIал кивру мялим вуйи. Гьадму саб вахтна абайи инглис чIалнаан вари халкьарин конкурсдиъ гъалибвал гъадабгъган, дугъаз кьюб вазлиз Америкайиз путевка тувнийи. Гьамус Эфруздира гьадму чан аба гъахьи Нью-Йорк шагьриз гъягъюз кIваъ хиял уьбхюра.
Гъит, ихь риш кIваъ айи вари хияларихъ ва мурадарихъ хъуркьри.
