Мейлан Нежефов
2023-пи йисхъанмина Палестинайиъ гъягъюрайи гьядисйири, душваъ мусурман чвйир-чйириина хурайи аьрвалар ва дурариз адабтIурайи баскъас гъябкъиган, жандилан зиз гъягъюрайихь.
Инсаф адру инсафсузари я бицIир, я аьхюр, я жилижви, я дишагьли дарпиди, багъри хизанарин арайиъ сир-мясляаьтниинди уьмур хъапIрайи 50 агъзурилан зиина касар тIанкь гъапIну. Гьелбетда, гьялал халкьдиина мицисдар аьрвалар хуз анжагъ террористарихьантIан даршул. Хъа террористариз я дин, я ватан, я миллет, я хал-хизан, я аба-баб аьгъдар. Сарун дидкан гизаф дарпишра, вари мяна гьамдиъ адаринхъа?! Дурарин гьякь-диван сар Аллагьди апIри. Амин!
Палестинайиъ дяви ккебгъу йигъланмина дагъустанлуйири дина сурсатарин гуманитарный гъагъ, дахъру йишвахъ мюгьтаж духьнайи бейнавйириз пажар ва гьацира жюрбежюр сурсатар сикин дарди хътаура. Мидланра савайи, варжариинди касар дилин ихь ругариина кьабул дапIну, халкь дурарин гъуллугънаъ а. Хъана дурарихьна инсанвалиинди лигуб ва кюмек тувуб ихь буржйирикан вуди гъубзра.
Гьаци, 6-пи январи «Табасарандин нурар» газатдин дустари, «Палестина, учу увухъди хъача» кIуру акцияйин шилнаъди 19 агъзур манат пул уч дапIну, дидихъ 5 тонна убхъру шид масу гъадабгъну ва Палестинайиз хътапIну. Шид варибдин кIул ву. Акцияйиъ шерик гъахьи касариз гьадму штун цIадларкьан савабар дикIри чпиз.
Шюкюр ибшри Первердигариз, ккуни вахтна дахърахьа, ккуни вахтна гъудужвурахьа, йишв-йигъ дарпиди ипIурахьа-убхъурахьа, адруб гъадабгъурахьа, алабхьурахьа. Хъана шюкюр ибшри Аллагьдиз варибдихъди ухьу гьамци фургьанди гьуркIну дерккнайивализ. Аферин ихь Ватандин гъуллугънаъ вафалувалиинди чпин буржи тамам апIурайи чIат айи ихь баяризра!
Хъа чпихьра мициб аьгьвалат ккунийкIан кIури, Палестинайиъ айи чвйир-чйирин кIваан фукьан хиялар гъягъюрайкIан? Душваъ халкь, гвачIнинган гъипIиш, лисхъан, лисхъан гъипIиш, хябяхъган фу ипIухьайкIан кIури, дерднаъ а. Дурарин язухъ ухьузтIан Аллагьдиз артухъ ибшри. Шикларин суратариан, видеойиан рябкъюрашра, аьхюдарин гафар-чIалариан ебхурашра, улариинди ухьуз думу кьисмат дарибшри. Хъа лигру гьялариан, мура ухьуз тувнайи имтигьян ву. Ихь аьхю абйир-бабари кIури шулу: «Садакьайин бицIиб-аьхюб айиб дар. Думу абхъру йишвакк ккудубкьру гъуси ву». Ав, закур улихь фу хьаш мялум дару рякъди гъягъюрайи ухьуз ухьу апIурайи ужувлан ва хайирнан ляхнар-карар гъияматдин йигъан даягъ ишри. Ухьу гьарган Аллагьди хил ккивнайи агьларикан ишри!
