Наргиз Гюлечова
Дагъустан Республикайиъ 27-29-пи мартдина 4-5-пи апрели аьхю мархьар ургъбиинди шагьрар-гъуларин рякъяриз хайлин зарар гъабхьну. Гьадмуган, региондин мяна айи рякъярин 161 участок вахтназ вуди хъяркьнийи. Мидланра гъайри, республикайин 33 муниципалитетарин арйириъ вуйи рякъярра чIур гъахьнийи. Гьаддихъанмина саки кьюб вазкьан дубхьну ашра, гьелелиг саспи йишвариъ айи рякъяр чпин айи гьялназ духнадар.

Республикайин транспортдинна рякъярин мяишатдин министерствойиан тувнайи мялуматариинди, гъийин йигъаз машинар хъаъну гъягъру рякъяр чIур духьну, хъадатIнайи гъулар адар, хъа вушра 15 участокдин рякъяр жара йишварихьанди гъягъруси дапIна.
«Республикайиъ 161 йишвахь пуч гъахьи рякъяр рас апIбан ляхнар кIули гъягъюра. Гъийин йигъаз рякъярин 146 участок рас дапIну, гьязурди а. Зарар гъабхьи рякъяр кьалушнарихьан ва зир-зибилихьан марцц ва рас апIбан ляхнариъ 102 рякъяриин либхру хусуси техника (бульдозерар, экскаваторар, автогрейдерар ва гь.ж.) ва гьацира 303 пишекар иштирак духьна.
Гьамусяаьт расвалин ляхнар гъягъюрайи йишвариин 65 техникайи ва 108 пишекри ляхин давам апIури ими.
ЧIур гъахьи рякъяр рас апIбан бадали лазим вуйи кьадар техникана пишекрар гьуркIну а. Рякъяр рас апIбан ляхнар, даргъуваларин аьгьвалатназ дилигну ва машинар гъягъру рякъяриз улупнайи пулин дакьатар гьисабназ гъадагъну, пландиинди кIули гъахура», – гъапну министерствойин пресс-гъуллугънан начальник Забит Маллаевди.