Зубайдат Шябанова
Гьаму йигъари Табасаран райондиъ «Пушкинский карта» программа гьяракатнаъ ипбахъди аьлакьалу серенжемар кIули гъушну. Душваъ райондин вари мектебдиъ заан классариъ урхурайидар, Табасаран драмтеатрин, Табасаран райондин тарихдинна юрд аьгъю апIбан музейин ва Кьасум Мягьямадовдин ччвурнахъ хъайи искусствйирин мектебдин вакилар иштирак гъахьнийи.
Серенжемдин иштиракчйири райондин БицIидарин яратмишарин хулу тешкил гъапIу программайиз заан кьимат тувну.
Уч духьнайидариз Табасаран райондин машгьур вуйи, тарихи ва культурайин йишварикан лекцйир урхбан кьяляхъ, Табасаран драмтеатрин актерари, Алтай республикайин искусствйирин лайикьлу гъуллугъчи, режиссер-постановщик Эмма Иришевайи диву «Ватан уьбхюрайидар» спектакль улупну.
Табасаран драмтеатрин актерари сягьнайиина абйирин наслин ирс ва баркаллу аьдатар уьрхюрайи гъийин игит эскрарин сурат адабгъну. Фуну вахтна вушра жилари Ватан уьбхюри гъахьну. Багъри жилихъан ва багахьлуйирихъан дурари, саб лик кьяляхъ дарапIди, жанар тувуйи ва гъира чпин уьмрар багъри уьлке бадали фида апIура.
Серенжемдиъ райондин искусствйирин мектебдиъ аьгъювалар гъадагъурайидари мукьмар йивру милли алатарин бицIи концерт улупбан кьяляхъ, аьшкь айидариз далдабу ва каманча йивбаан мастер классар гъухну. Хъа асас вуди мектебариъ урхурайидариз концертдин программайиъ халкьдин ялхъвнар апIбан номер кьабул гъабхьнийи.
«Пушкинский карта» гьяракатнаъ ипбан серенжемар шубуд йигъан гъушну. Думу серенжемариъ райондин мектебариъ урхурайи 1000-тIан артухъ баяр-шубар иштирак гъахьнийи.
«Культурайикан аьгъювалар гъадагъуб сифтена сифте багъри юрд аьгъю апIбалан ккебгъну ккунду. Гьаму программа гьяракатнаъ ипували ихь бицIидариз багъри райондикан мялуматар гъадагъуз хайлин кюмек тувди. Ихь жигьилариз гьюкуматдин гьисабнаан культурайин серенжемариъ иштирак хьуз мумкинвал дубхьна. Чан халкьдин тарих ва культура аьгъю ва ккуни кас, ихь аьхю Урусатдин милли культурйиринра гъаври шулу. Гъюру йисарира Пушкинский карта уьмрин гьяятдиз адабгъру серенжемар давам апIурхьа», – гъапну Табасаран райондин глава Мягьямед Къурбановди.
