Зубайдат Шябанова
«Гьамусяаьт хусуси метлеб айи дявдин операцияйиъ ихь игитари, эскрари ва офицерари, чпин хушниинди думу женгариз душнайи ватандашари, Донбассдин агьалйирин, ихь веледарин ва худларин ислягь уьмур ва Ватандин азадвална сариканра асиллу дарувал уьбхюри, багъри чвйирси – албагну гъати женгнаъ инсанвалин варитIан заан дирбаш’вал, ватанпервервал улупура», – гъапнийи уьлкейин Президент Владимир Путинди.
Президентди хусуси метлеб айи дявдин операцияйин аьгьвалат гьаммишан гюзчиваликк уьбхюра. Гъябгъюрайи йисан 21-пи февралиъ дугъу сабпи йигъланмина дявдин женгарин кIакIнаъ айи РФ-дин Тихоокеанский флотдин гьюлин пияда кьушмарин 155-пи гвардейский бригадайин гьякьнаан къарар кьабул гъапIну. Думу къарариз тялукь вуди, 155-пи бригадайиз Жуковдинна Суворовдин орденар ва гьюрматнан «Курский» ччвур тувну. Ватандин Аьхю дяви ккудубкIхъанмина военный дестейиз варитIан важиблу гьядисйир шулайи аьтрафдин ччвур тувуб сабпи ражари шулайиб ву. Гъубшу йисан 19-пи декабриъ Владимир Путинди чан прямой эфириз думу дестейин пайдагъра хьади гъафнийи.
155-пи бригадайин эскрарин игитваларикан, вари уьлкейизси, Киевдиъра, ригъ алабхъру терефнан Украинайиъра, Европайин уьлкйириъра мялум дубхьна. Думу дестейин игит эскрари гъира дявдин варитIан улхьан жергйириъ чпи жанлу ватанпересар вуйиб улупура. Дурарикан гьарсари ихь уьлке хатIасузваларихьан уьбхюри, ислягь гележегдик чпин лайикьлу пай кивра.
Гьадму бригадайин игит эскрарин дахилнаъ Табасаран райондин ТинитI гъул’ан вуйи Тимран Мягьрамовара а. Гьаму йигъари узу Тимрандихъди телефондиан сюгьбат гъубхнийза. Ич сюгьбат яракьдин пакьари швнуб-саб ражари кьатI гъапIнушра, дугъу чаз мумкинвал ккабхъубси, зенг апIури, улхуб давам апIури гъахьунча.
Тимрандиз военный гъуллугъ мектебдиъ имидитIан ккуниб вуйи, ва 2015-пи йисан Мурманск шагьриъ армияйин гъуллугъ гъабхувал аьхирихъна гъафибси, думу Тихоокеанский флотдин гьюлин пияда къушмарин подразделениейин кIулиъ айи чпин мирас Рустам Къалабеговдихьна Владивостокдиз гъушну ва душваъ контрактдин къайдайиинди гьюлин пияда кьушмарин гъуллугънаъ учIвну.
Гьамусяаьт аьхюнур сержант Тимран Мягьрамов чпин бригадайин артиллерияйин отделениейин командир ву. Думу «Игитвал улупбаз лигну» медалин сагьиб духьна, дугъаз сабсана медаль тувуз документар Москвайиз хъадаъна.
«Хусуси метлеб айи дявдин операция ккебгъайиз учу дявдин аьгъювалар гъадагъуз Белоруссияйиз гьаънийи. Дяви ккебгъган, Украинайин аьтрафариина сарпидарди гъафидар учу вуйча. Ученйир ва гьякьикьи дяви чиб-чпихьди тевуз шулдар. ИкибаштIан, сифте йигъари гъагъиди вуйчуз. Мидланра гъайри, Украинайин агьалйири учу фици кьабул апIурушра аьгъдайчуз. Хайлиндари ихь тереф дибиснайи. Хъа учуз ачухъди къаршувал улулупри, учу айи йишван координатар ВСУ-йиз кIурударра гъахьну. Учу ВСУ-йин эскрари аьрвалар гъахидар, зулмарикк ккитнайидар, подвлариъ итнайидар хайлиндар азад гъапIунча.
Ич бригадайиъ дявдин вари жюрейин кьувватарин дестйир а, гьадму гьисабнаан гьюжум апIру ва артиллеристарин дестйирра. Штурмовой десте улихьна гъябгъбан бадали, учу ихь дронариан туву координатариинди ВСУ-йин эскрар айи йишвар марцц апIурача.
Сабсана пуз ккундузуз, зийнар духьну госпиталариан удучIву эскрар кьяляхъ дявдин женгариъ иштирак хьуз гъюру. Магьа узуз улихьнаси зийнар гъахьунзуз. Госпиталиъ айи вахтна йиз дявдин юлдшарикан вуйи фикрариан сикинвал дибрихъри гъахьунзуз. Хъа гьамушваъ хатIа аьхюб ашра, дустар-гъардшарихъди хъайиган, юкIв архаинди шулу. Хулаз отпускдиз хизандихьна гъушишра, фикрари дустарихьна гъахурзу. Мисалназ, ич мирас Рустам Къалабегов гъадагъиш, думу кьюб ражари Кьягьялвалин ордендин сагьиб гъахьну. Сабпиб – Сирияйин гъабхьи дявдиъ, кьюбпиб – хусуси метлеб айи дявдин операцияйиъ тувну. Думу, гъагъи зийнар духьнашра, дявдин чюлиъ игитриси женг давам апIури гъузну. Гьацдар эскрар варидариз нумуна ву. Магьа гьаму йигъари шубуб суткайин арайиъ ич бригадайи 9 гъул ВСУ-йин нацистарихьан азад гъапIну. Гьацдар баяр гъвалахъ хъайиган, жвувра игит духьну ккунду.
Хусуси метлеб айи дявдин операцияйиъ иштирак шулайи баярин терефнаан учуз рягьимлувалин кюмек хътапIурайи гьарсар касдиз жа-жаради чухсагъул пуз ккундузуз. Учву хътау шей’ар вари учухьна рукьура. ВаритIан гизафси эскрар мектебариъ урхурайи баяр-шубарихьан вуйи кагъзариин разиди шулу. Дурар сар-сарихьан дисури, швнуб сабан урхури шулча. БицIидари дурарик учуз ужудар гафар дикIура, учкан гъалибвал гъадабгъну сагъди кьяляхъ гъюб ккун апIура. Дурарин кIваантIан вуйи бицIи хилари гъидикIу цIарари учуз гафариинди ачухъ апIуз даршлу марцци гьиссарин кьувват туврачуз. Думу кагъзар блиндаждин вари цаларик керхнача», – ктибтнийи ич сюгьбатнаъ Тимран Мягьрамовди.
Тимрандиз ва дугъан уьмрин юлдаш Бесханумдиз сар риш а. Бесханум, Сафияра хъади, Владивостокдиан Тимрандиз багахьна, Ростов шагьриз дуфна.
Табасаранарин халис ватанпервер, гьякьикьи игит эскер Тимран тербияламиш гъапIу дугъан абйир-бабариз – ТинитI гъул’ан вуйи Герман ва Анжела Мягьрамовариз- аферин!
Ихь бицIидарин кагъзарик кайи гафар учура текрар апIурача: гъит ихь игитар гъалибвал хьади, сагъ-саламатди кьяляхъ гъюри. Амин!
