Зубайдат Шябанова
Гьаму йигъари Табасаран райондин ТIивак гъулан Аьбдулмалик Къурбановдин КФХ-йиз Ставрополь шагьриъ ерлешмиш дубхьнайи Кафари Кавказдин федеральный гъулан мяишатдин илмарин, федеральный центрин (Северо-Кавказский ФНАЦ) делегация гъафну.
Делегацияйин дахилнаъ ФНАЦ-дин селекцияйин ва тумар битмиш апIру центрин кIулиъ айи Елена Батагова, тумар битмиш апIру отделин заведующий Ирина Рауш, Ставрополь крайин селекционерарин ва тумар битмиш апIру мяишатарин партнерарин НК-йин председатель Хусин Борануков айи.
ФНАЦ-дин вакилари чпи Аьбдулмалик Къурбанов гъагну. Дурарин гафариинди, Аьбдулмалик Къурбановдин КФХ-йин мулкар ФНАЦ-дин селекционерари арайиз гъахи цIийи жюрейин дяхнин тумар урзуз варитIан мублагъ жилар ву. Гъулан мяишатдин ишлетмиш апIурайи деврин технологйирин терефкар вуйи Аьбдулмалик Къурбановди, дуфнайи хяларин ахтармиш апIбариз кьимат тувну, чан мулкариин дяхнин цIийи сортарин тумар урзувалин теклиф аьшкьниинди кьабул гъапIну.
КФХ-йин мулкариин урзуз дяхнин кьюрдун тумарин 16 жюре улупну. Гьарсаб жюрейиз жиларин 1 гектар хъадабкнайи йишв жара дапIна. Эксперимент гъабхурайи йишвариин лихру техника гьязур апIбан, убзру тумран лазим вуйи кьадар, уьзрарихьна дурарин дурумлувал, артухъди лам айивалин шараитариъ ккадабцIру бегьер ва гьамцдар жара месэлйир ахтармиш ва гьял апIура.
ИкибаштIан, райондиз уьлкейин селекционерарин улихь хьайи центрариан вакилар гъюб – му ужудар мумкинвалар шлу ляхин гъабхьну. Табасаран райондин гъулан мяишатдин отделин начальник Аьгьмад Аваев кIулиъ ади, вари отдел, райондин агротехникайин пишекрар ва фермерар сатIиди Ставрополиан дуфнайи хяларихьна гюрюшдиз гъафну.
«Сар-сарин тажрубайихъди таниш шули, ихь гъуларин мяишатарин карханйирин ва селекционерарин сатIи вуйи ляхнари райондин аьтрафариин убзру тахилин бегьерин кьадар артухъ апIуз ужуб мумкинвал тувру. ЦIийи тахилин ихь шараитариъ апробация гъабхиди. Мидланна гъайри, ФНАЦ-диъ урзру тахилин тумарси, йимишарин ва мейвйирин цIийи жюрейин тумарра арайиз хура. Дурарра ихь райондиъ битмиш апIуз мумкинвал а», – гъапну Аьгьмад Аваевди.
