Зубайдат Шябанова

Улихьна йигъари Табасаран райондин Мягьрягъ гъулан «Радуга» бицIидарин багъдиъ вари Урусатдин «ВаритIан ужур тербиячи – 2025» пишекарвалин конкурсдин муниципальный пай кIули гъубшну.

 

Табасаран райондин глава Мягьямед Къурбановдин ччвурнахъан мани гафар хьади, конкурсдин иштиракчйирихьна главайин заместитель Заур Мусаев илтIикIнийи, ва дугъу тербиячйириз хъуркьувалар ккун гъапIнийи.
Конкурсдиъ Дарвагъ гъулан «Улыбка», ТIивак гъулан «Колокольчик», Гъужник гъулан «Чебурашка», ТинитI гъулан «Ручеек», Хянягъ гъулан «Рубас», ЧвулатI гъулан «Огонек» бицIидарин багъарин тербиячйир иштирак гъахьну.

Программа шубуб пайназ жара дапIнайи. Сабпи пайнаъ иштиракчйири бицIидарихъди вуйи педагогвалин ляхниъ чпи ишлетмиш апIурайи яратмиш’валин къайдйирикан ктибтнийи. Кьюбпи пайнаъ мектебдиз улихьна вуйи яшнан бицIидарихъди жюрбежюр ляхнар гъахувалиан чпиз айи аьгъювалар улупнийи, хъа шубубпи пайнаъ тербиячйири жюрийин улихьна чпин педагогвалин хусуси разработкйир адагънийи.
Конкурсдин натижйириинди сабпи йишваз Дарвагъ гъулан «Улыбка» бицIидарин багъдин тербиячи Афила Уружева лайикь гъахьну. Кьюбпи йишв ТIивак гъулан «Колокольчик» бицIидарин багъдин тербиячи Динара Базутаевайи, шубубпи йишв’ина Къужник гъулан «Чебурашка» бицIидарин багъдин тербиячи Айнура Абакаровайи гъазанмиш гъапIну.

Муниципальный пайнаъ сабпи йишв гъадабгъу Афила Уружева Табасаран райондин терефнаан Мягьячгъала шагьриъ гъябгъру вари Урусатдин конкурсдин республикайин пайнаъ иштирак хьиди.