Шми кислород ва азот
Къизларин электрикайинна механикайин заводдиъ кислород тартиб апIру станция ачмиш гъапIну кIури, Дагъустандин промышленностинна ариш-вериш’валин министерствойиан хабар тувра. Думу станцияйиъ шми жюрейиинди саб сяаьтнан арайиъ 800 кило кислород ва азот, хъа суткайин арайиъ 21 тонна гьясил апIура.
Къайд апIуб лазим вуки, му станцияйихьан саки 100% марццишин айи кислород ва азот гьясил апIуз шула. Гьацира дупну ккундуки, гьясил апIру кьадар, асас вуди, мюгьтаж’валикан асиллу ву. Янаки станцияйиъ гьясил апIурайи шми сурсатдихъди, Дагъустанси, Кафари Кавказдин вари регионарра ва Краснодар крайра тямин апIуз мумкинвал а, фицики му-шваъ вазлин арайиъ 600 тонна кислородна азот гьясил апIура.
Яркврар цIийирихьан уьрхюра
Дагъустандиъ манишин яманди абхънайивализ лигну, яркврар цIихьан уьрхбан бадали, цIиз къаршу вуйи профилактикайин уьлчмйир кьабул апIура. Гьамусяаьт яркврариъ цIа кабхъбан къурху 4-5-пи дережа-йиинакьан за дубхьнайивализ лигну, яркврариз гъягъюб гъадагъа апIбан бадали, республикайин муниципалитетарин яркврариз гъягъру йишварихь шлагбаумар дивна.
Дагъустан Республикайин ярквран мяишатдин комитетдин пресс-гъуллугънаан тувнайи мялуматариинди, улихьна йигъари сабсана шлагбаум ЦIумада райондин ярквраризди гъягъру рякъюъ дивну.
Мидланра гъайри, районариъ ва гъулариъ айи ярквран мяишатдин пишекрари, яркврар ва душвариъ айи гьяйватарна ничхрар цIихьан уьрхбан бадали, гъуларин агьалйирихъди яркврариз дурушбан гьякьнаан ва яркврар багьахь хьайи гъулан мяишатдин жилариин укIар-кьаларик цIийир кидрирчувал ккун апIури, сюгьбатар гъахура. Эгер цIа кабхъувал ва цIа кипувал ашкар гъабхьиш, дицдар касарин журум апIиди.
ЦIийикIултIан ЕГЭ тувну
Дагъустан Республикайиъ цIийи-кIултIан ЕГЭ тувуз улупнайи йигъари имтигьян тувуз 3589 выпускникди аьрзйир тувнийи. Имтигьян тувну ккуни июлин 4-пи ва 5-пи йигъари мурарикан ЕГЭ-йиз 3109 баяр-шубартIан гъафундар.
Дагъустан Республикайиъ Рос-обрназдорин Управлениейин пресс-гъуллугънаан тувнайи мялуматариинди, ЕГЭ тувуз гъафи 3109 касдикан 8 выпускникдин ляхнар, имтигьнин къайда чIур апIбаз лигну, кьабул гъапIундар, хъа 94-рихьан, сагъламвалихъди аьалакьалу вуди, ЕГЭ аьхириз ккудубкIуз гъабхьундар.
Къайд апIуб лазим вуки, Урусатдин Президентдин жягьтлувалиинди, гьаму йисан сабпи ражари вуди, ЕГЭ-йин эвелиан вуйи натижайиин рази дару баяр-шубариз сабансан имтигьян тувуз мумкинвал гъабхьну. Кьюбпи ражари ЕГЭ тувбиинди сифтейин натижйир батIил шула.
Айи мялуматариинди, цIийи-кIултIан имтигьян туву баяр-шубарикан 295 касдин натижйир сабпи ражаринсдар гъахьну, 2112 касди сабпи ражаритIан заан вуйи баллар гъадагъну ва 600 касди имтигьян сабпи ражаритIан ис вуйи баллариз тувну.
