Нариза ТIаибова

Гьюкумат экономика жигьатнаан артмиш хьпаъ рякъярин мюгькамвалин эгьемият аьхюб ву. Фицики дурари, шак адарди, агьалйирин арайиъ аьлакьйир уьрхбаъ, гъулар шагьрарихъди сатIи апIбаъ аьхю роль уйнамиш апIура.

 

Хив райондин сяргьятариин али республикайин эгьемият айи «Мамраш–Ташкапур–Аракандин гъяд» рякъ къайдайиъ уьбхбан ляхнар гъахури гъахьнушра, рякъюн асфальт хайлин йишварихьан дутIубкIну, гъийин заманайин вари тIалабариз жаваб тувру гьялнаъ адайи. Гьякьикьат фикриз гъадабгъну, РД-йин транспортдин ва рякъяр тикмиш апIбан министерствойин жягьтлувалиинди улубкьнайи йисан эвелариан думу рякъ рас апIбан ляхнар ккергъну.

Дупну ккундуки, му рякъю Дагъустандин ургуб район чиб-чпихъди аьлакьалу апIура.
Рякъ рас апIбан ляхнар гъахурайи «ДБС ГРУПП» ООО-йин вакили субут гъапIганси, улупнайи рякъ, ЦIанитI гъул’ан ккебгъну, Лика гъулазкьан 6 км манзилнаъди дибдиан рас апIиди.
Рякъ’ин, йирси асфальт алдабгъну, цIийи асфальт улубзбалан савайи, пишекрари рякъюн гъирагъдихъди ккивнайи канализацияйин гъурулуш тIалабариз тялукь шлуси къайдайиккна хпан, рякъюъ хатIасузвал уьбхбан месэлйиризра фикир тувра. ЦIийи рякъ чвлин эвелариъ ачмиш апIбанди ву.