Мейлан Нежефов

1-пи апрелилан ккебгъну 15-пи июлизкьан давам шулайи хьадукран призывдин дахилнаъди Хив райондиан Урусатдин Яракьлу кьувватарин жергйириз ктабхъурайи гьяфтайи ургурсан жигьил гьаъну.

 

2-пи июли райондин главайин заместитель Мирзабег Багъичевди, Хив ва Агъул районарин дявдин комиссар Сулейман Гьюсейновди, военкоматдин гъуллугъчйири, абйир-бабари ва багахьлуйири му жигьил баяр, ягъур ибшри дупну, насигьятнан гафариинди рякъ’ин гъапIнийи.

Бай рякъ’ин апIури юкIв сефилди айи Имара Уьсмановайин багахь гъахьнийза. Дугъу гьамци гъапнийи: «Узуз жили велед тувган аьгъяйзуз дугъахъ му йигъ хъайиб. Вушра бабан юкIв ву сарун, гьарган фикрикк ккайи… Вахт сикинуб дар, диди ухьук артухъди гъалабалугъвал кипра. Гъит дюн’яйиъ ислягьвал ибшри. Армияйиз гъягъдарза кIуру бай бабахъ зат хътришри. Сагъ-саламатди душну, чпин сад йисандин вазифа намуслувалиинди ва баркаллувалиинди кIулиз адабгъну хъадакну гъюру агьларикан ишри. Гъит гъарахри, рякъюъ – ягъур, гъуллугънаъ хъуркьувлар ишри!

Украинайин цIин ялав айи аьтрафариина cарра кьадар-кьисмат даришри чпи. Хъа гьадушваъ миллетчйирихъди женг гъабхурайи ихь баярра вари гъалибвал хьади хъадакну гъюри. Фуну тIуб гьадабтIишра, бабан кIваз иццру апIуру. Наан пакьарин ва гюлйирин сес гъабхьиш, бабан кIваан гьарай гъябгъюру. Гьаддиз ккун апIурза ихь уьмур сабвалиъ, чвевалиъ ва хушбахтвалиъ аьсрариинди давам хьуб».