ЗУБАЙДАТ ШЯБАНОВА
28-пи мартди Табасаран райондин Хючна гъулан аьхю стадиондиин райондиъ «Динамо» (Москва) футболин клубдин филиал ачмиш апIбан шадлугънан серенжем кIули гъубшну. Райондиъ спортдиин юкIв алидариз думу важиблу гьядиса гъабхьну, фицики цIийи клубди хайлиндариз гележегдиъ спортдиан заан натижйирихъна гъюз мумкинвал тувди.
Серенжемдиъ Табасаран райондин глава Мягьямед Къурбанов, «Динамо» клубдин мектебдин генеральный директор Алиби Асланов, «Динамо» (Москва) клубдин Дагъустан Республикайиъ айи мектебдин директор Дмитрий Зинин, Урусатдин сборныйдиъ ади гъахьи, клубдин мектебдин спортивный директор Руслан Пименов ва жарадар иштирак гъахьну.
Урусатдин ва Дагъустандин гимнар йивбан кьяляхъ серенжемдин иштиракчйирихьна ва дуфнайи хяларихьна Мягьямед Къурбанов илтIикIну.
«Гъи ихь бицIидариз «Динамо» (Москва) футболин клуб ачмиш апIуз мумкинвал гъабхьунхьуз. Думу республикайиъ Мектебарин футболин лига ачмиш гъапIу Дагъустандин глава Сергей Меликовдин жягьтлувалиинди ва дугъу туву кюмекниинди арайиз гъафиб ву.
Табасаран райондиъ «Динамо» клубдин филиал ачмиш апIували цIийи футболистар тербияламиш апIиди. Ихь район игитарин ватан ву. Урусатдин 5 игит ихь ватандашар вуйихь, гьаддиз ихь живанарира чпин мумкинвалар заан дережайиинди улупрувалиин ва, «Динамо» футболин клуб машгьур апIури, ухьуз гележегдиъ ихь райондиан хайлин баярин ччвурар ерхьрувалиин умудлу вуза. Райондиъ футболин клубдин филиал ачмиш апIбак пай кивдариз варидариз чухсагъул пуз ккундузуз. Натижйир учву рази апIрудар ишри», – гъапну Мягьямед Къурбановди.
Дмитрий Зининди ва Руслан Пименовди, филиал Урусатдин халкьарин сабвалин йисан абццрайивал къайд апIури, жигьил футболистариз тренерарихъ хъпехъуб, ужудар натижйирихъна гъюб, гележегдиъ ужудар инсанар ва чемпионар хьуб ккун гъапIну.
Серенжемдин кьюбпи пайнаъ «Динамо» (Каспийск) ва «Динамо» (Мягьячгъала) мектебарин 2014-пи йисан бабкан гъахьидарин ва Табасаран райондин сборный командайин арайиъ дуствалин матч гъабхьну. Талитдиъ 3:2 гьисабниинди табасаран команда гъалиб гъабхьну.
Талитарин кьяляхъ цIийиди абццу филиализ живанар кьабул апIбан серенжем ккебгъну. «Динамо» клубдин девиз «Саб уьмур – саб команда» варидари сатIиди дупну, табасаран живанарира чпи му командайин саб пай гъахьивал субут гъапIну.
Гьадму серенжемарин дахилнаъди Табасаран райондин глава Мягьямед Къурбановди райондин 3-пи нумрайин бицIидаринна живанарин спортдин мектебдин директор Садикь Уьсманов Вариурусатдин профсоюздин значок тувбиинди лишанлу гъапIну.
Ич сюгьбатнаъ Садикь Уьсмановди мялумат тувганси, райондиъ цIийиди абццнайи «Динамо» (Москва) клубдин филиализ дурарин мектебди вари терефариан кюмекар тувди. Гьамусяаьт думу клубдиз 15 бицIир кьабул дапIна. Дурар Табасаран райондин жюрбежюр гъулариан ву. Тренировкайиз дурар гьар кьюд йигъак сабан гъюру. «Динамо» (Москва) клубдин филиалин мектебдиз бицIир кьабул апIайиз, дугъан футболихьна вуйи аьшкьназ ва мумкинвалариз фикир тувру. Хусуси метлеб айи дявдин операцияйиъ кечмиш гъахьи ва душваъ иштирак шулайи эскрарин бицIидар футболин клубдиз пулсузди кьабул апIура, хъа имбудари гьар вазли 2 500 манат тувну ккунду. Гьамусяаьт клубдин вахтназ вуйи тренерди Мягьямад ТIаибов тяйин дапIна.
