Нариза ТIаибова

Урусат аьсрариинди сар-сарин багахь жюрбежюр миллетар албагну, саб хизандиъси яшамиш шулайивалиинди кьувватлу ву. Хъа вари гьюкуматдин улупбарин арайиъ Дагъустандикан гъулхиш, дагълуйир чпин сар-сарихьна вуйи дуствалиинди адлу шула.

 

Мялум вуйиганси, улубкьнайи 2026-пи йис уьлкейин Президент Владимир Путиндин къарарниинди Урусатдин халкьарин сабвалин йис вуди мялум дапIна.
Гьаму йигъари Хив райондиъ му лишниккди ватанпервервалин серенжем кIули гъубхну. Мярака ачмиш апIури, Хив райондин главайин заместитель Мирзабег Багъичевди вари жямяаьтлугъ тебрик гъапIну.

– Ухьу ихь гьюкуматдиъ аьсрариинди 190-рилан зиина миллетар албагну, сар-сарин гъуллугънаъ айи яшайиш балгбиинди уткан ва кьувватлу вухьа. Му кьадар миллетар сатIиди яшамиш шулайивали уьлке анжагъ мюгькам апIура.

БицIидарин багъарилан хъюгъну, Урусатдин шагьрариъ ва гъулариъ дуствал уьбхбан, артмиш шулайи наслар рюгьнанна эдеблувалин, ватанпервервалин гьиссариккди тербияламиш апIбан месэлйириз дикъатниинди фикир тувра. Милли жюрбежюрвалиинди ухьу кьувватлура, утканра вухьа.
Дупну ккундуки, гъи ухьу, ихь халкьарин арайиъ мясляаьт гъубзбан, думу хъанара мюгькам апIбан гъаразнаъ ади, мектебариъ, культурайин ужагъариъ, жямяаьтлугъдин арайиъ гъабхурайи ляхин имбубсан жанлу апIуб лазим ву гъапиш, ягъалмиш шулдар.

Гъийин сикинсуз девриъ ихь дагълу юрднан, вари Урусатдин мюгькамвал ва хатIасузвал сабваликан асиллу вуйиб кIваин уьбхюри, йишвариин ляхин гъабхидихьа. Ихь абйири кIури гъахьиси, сар кас чюлиъ игит дар. Гьаци, халкьдин сабвали дагъларра табигъ апIуру. Му гафарин кьувватлувал аьхиримжи йисари СВО-йин гьяракатариъ иштирак шулайи ихь жигьиларира субут апIура.

СатIивалиинди кьувватлу вухьа! Гъалибвал ихь терефнаъ шлувалиинра инанмиш вухьа! – аьлава гъапIну дугъу.
Шадлугънан мярака райондин культурайин ва образованиейин вакиларин уьмуми кьувватариинди гьязур дапIнайи концертдиинди давам гъабхьнийи. Мектебариъ ва бицIидарин багъариъ урхурайидари улупу сягьнийири серенжемдиин артухъ мешреб алапIнийи.