Мейлан Нежефов

Хив райондин ЦРБ-йиъ ва гъуларин ФАП-ариъ лихурайи пишекрари, агьалйирин сагъламвал уьбхбан гъаравлиъ ади, жавабдарвалиинди ляхин гъабхура. Амма саб бязи гъулариъ ерлешмиш духьнайи ФАП-ар 21-пи аьсрин тIалабарихьан ярхлади а. Райондин аьзарханайин кIулиъ айи Индира Багъичевайи къайд гъапIганси, райондин гьякимари, мициб аьгьвалат деврин шартIарихъна хуз кьаст ади, гъизгъинвалиинди ляхин гъабхура.

«Ав, гъи сагъламвалин гъаразнаъ ади райондиъ гъабхурайи ляхникан дамагълуди ктибтуз шулхьухьан. Улихьна йисариси дарди, гьамус, гъуларин ФАП-риин мешреб алапIура, дурарихьна гъягъру рякъяр дюз апIура, дина убхъру шид зигура, хъа пишекрариз лазим вуйи алатар хиликкна гъюра. Магьан гьаму йигъари Ляхла ва Мажвгул гъуларин ФАП-арин дараматар, капремонт дапIну, аьхирихъна хура. Хъа Зилдикк гъулаъ модульный ФАП дивуз къарар адабгъну, шиблитIин ва заливкайин ляхнар тамам дапIна. Аллагьдин амриан, аьхълушнар хьайиз думура кIулиз адабгъидихьа. Гуж гъабхьиган, юртнан ккумра жилиз гъябгъюру, гъапиганси, улихь-кIулихь хьайидарин гаф райондихъди юкIв убгури саб гъабхьиган, фукьан вушра хайирлу ляхнар арайиз хуз шулу. Улихьна йигъари райондин глава учв Зилдикк ва Ляхла гъулариъ гъахурайи ляхнарилан ул алдатуз гъушнийи. Устйириз алахьурайи гъулайсузвалар ва читинвалар арайиан адагъуз чарйир дагну, ляхниз хъана артухъ кьувват тувнийи. Аьзарханайиз илтIитIикIруси, райондин гьарсар агьалийиз жандиъ мюгькам сагъ’вал, хъа беден ккабгъиш, дердназ дарман анжах райондин мулкниин бихъуб ккун апIураза», – гъапнийи ич улхбаъ ЦРБ-йин кIулиъ айири.