Наргиз Гюлечова
Магьа хьадра аьхирихъна гъюра. Урхбан цIийи йис улубкьура. Абйир-бабар мектебдиз гъягъру бицIидар урхбан йисахьна гьязур апIбан гъайгъушнариъ а. Урусатдин мярифатнан министерствойиан вуйи мялуматариинди, цци ихь уьлкейиъ 17 миллионна гьацI баяр-шубар мектебариз гъягъиди. Гьадрарикан 1 миллионна 500 азур 1-пи классариз гъягъюрайи бицIидар ву.

Гьаму йисан Дагъустандин республикайин образованиейинна илимдин министерствойи мектебариз гъягъюрайи баяр-шубари варидари мучIу – укIу рангнан саб жюрейин палат алабхьну ккунивал тасдикь гъапIну. Вари урхурайидари саб жюрейин палат алабхьбахъди сабси, мухрик муниципалитетдин гербдин вая бицIир урхурайи мектебдин лишанра кади ккунду. Янаки гьамус абйир-бабари чпин веледар, министерствойи улупнайи регламентдиинди тялукь палтарихъди чарасуз тямин дапIну ккунду. Му жюрейин палатдиз кьялан гьисабариинди 6 агъзур манат удубчIвура. Гьаддихъди алабхьру лизи ккуртарин кьиматра 2-4 агъзур манатдиина ву. Палтарихъди сабси, ликариин алахьрударра ккунду. Дураризра, кьялан гьисабниинди, 3-5 агъзур манат харж хьибди.
Мидланра гъайри, физкультурайин дарсаризра спортивный форма ва ликариин алахьрудар лазим ву. Дураризра 6-7 агъзур манат удубчIвура. Гьаддихъди сабси жвуван веледариз ручкйир, тетрадар ва лазим вуйи имбу алатарра абйир-бабари масу гъадагъну ккунду. Гьаци, китабар ивру чантайин кьимат 2 агъзурилан 7 агъзуриина ву, тетрадаризна ручкйириз 6 агъзурсан удубчIвура.
Мектебдиз 8-пи классдиз бай гьаърайи Каспийск шагьрин агьали Мар’ямдин гафариинди, дугъу чан бализ гъадагъу палтариз удубчIву кьимат 25 агъзур манат ву.

 
«Йиз гьелелиг мектебдиз гъягъюрайир сар байтIан дариз. Дугъаз лазим вуйи вари шей’ар Хасавюртдиз душну, гьадушв’ан гъадагъунза, фицики, Каспийскдиъна Хасавюртдиъ кьиматарин гизаф фаркьвал а. Мектебдиз алабхьру хусуси форма ктарди, жара палатра лазим ву. Гьадму формайиз ухшар вуйи, гьюдюхру сабсана жар палат гъадабгъну, гьязур дапIназа», – кIура му дишагьлийи.
Хъа 9-пи классдиз бай ва 5-пи классдиз риш гъягъюрайи Рамиляйин гафариинди, дугъу гьарсар бицIириз мектебдиз лазим вуйи шей’ариз сумчIур агъзур манат харж гъапIну.

«Дюзди кIуруш, вари лап багьади ву. Узуз цци сар студент ва кьюрсана мектебдиз гъягъюрайи веледар азуз. Урхбан йисахьна дурар гьязур апIуз гъийин йигъаз 80 агъзур манат харж дапIназа. Гьелелиг гъадагъуз ккимбу шей’арра имийиз. Мектебдиан вари китабар туврушра агъдар. Дурарра масу гъадагъну ккунду. Му кьиматариз гъилигиган, касибвал кайи, гизаф бицIидар айи хизанариз урхбан йисахьна веледар гьязур апIуз лап гъагъиди алабхъуру», - аьлава гъапIнийи Рамиляйи.