Гюльнара Мягьямедова
Мартдин 6-пи йигъан Москвайиъ Урусатдин президент Владимир Путин Дагъустандин глава Сергей Меликовдихъди гюрюшмиш гъахьну. Дурарин арайиъ гъабхьи сюгьбатнан натижйирикан республикайин кIулиъ айири Мягьячгъалайин аэропортдиъ журналистариз ктибтнийи.
Сергей Меликовди хабар тувганси, уьлкейин президентдихъди гюрюшмиш хусуси метлеб айи дявдин операцияйин иштиракчйириз ва дурарин хизанариз туврайи кюмекнан месэла гьял апIбалан ккебгънийи. Сергей Меликовди Президентдиз «Дагъларин жюр’этлувал» программа уьмриз кечирмиш апIбан натижайиъ хусуси метлеб айи дявдин операцияйиъ ургур иштиракчи гъуллугъариъ дерккнайиваликан ктибтнийи. Президентди чан терефнаан, ихтибарлу сюгьбат гъабхури, 1999-пи йисандин гьядисйир кIваин дапIну, уьлкейиз Дагъустандин асас мянайикан гъапнийи.
Дагъустан республикайин кIулиъ айири Владимир Путиндин улихь, региондин хъуркьуваларихъди сабси, гьял дарапIди гъузнайи месэлйирра гъитIирккнийи. Хъуркьуваларикан улхури, дугъу тIумтIарин бегьернакан (302 агъзур тонн), аьхиримжи 5 йисандин арайиъ тикмиш дапIнайи 111 мектебдикан, фельдшервалинна акушервалин 122 пунктнакан ктибтнийи.
Сергей Меликовди президентдиз Багахь Востокдиъ гъягъюрайи гьядисйирихъди аьлакьалу вуди, Дагъустандиан гъагъар ади гъушу ва гьамус кьяляхъ гъюз даршули Ирандиъ дийигънайи машинарикан гъапнийи. Республикайин главайин гафариинди, Владимир Путинди гьяракатниинди думу месэлайиз фикир тувнийи.
Мидланра савайи, уьлкейин кIулиъ айири Дагъустандиъ меркк али майдан тикмиш апIбан месэла тартиб апIбан табшуругъар тувнийи. Айи мялуматариинди, республикайин глава Владимир Путиндихьна инфраструктурайин саб бязи проектариз пулин аьлава дакьатар деетуб ккун апIури илтIикIнийи, гьадму гьисабнаъди Мягьячгъалайин ва Каспийскдин чиркин штар марцц апIру дараматдизра (8,94 миллиард манат), Дербентдин багахь хьайи туристический кластерин технологйир гьяракатнак кирчбазра (6,9 миллиард манат) пул ккун гъапIнийи.
Владимир Путинди ва Сергей Меликовди регион электроэнергияйихъди, штухъди тямин апIбан, туризм артмиш апIбан, рякьярин мяишатдин ва даргъурайи хулариан агьалйир адаъбан месэлйир гьял гъапIнийи. Дагъустандин кIулиъ айири республикайиъ «чру» энергетикайик (яна микIлан, ригъдин кьувватниинди) агьалйир аквнахъди тямин апIбан читинди дийибгънайи месэла гьял апIбак умуд киврайиваликан гъапнийи. Президентди думу теклифназ чан разивал улупнийи.
«Президентдиз ихь дих ебхьура, теклифариз разивал улупура, дугъан ухь’ин хъугъвал ал. Гизаф йисари ухьу гъитIирккурайи месэлйир гьамус ришвуз хъюгъна, багарихьди Дагъустандин гьарсаб хизанди гьисс апIру натижйирра хьиди», – гъапнийи республикайин кIулиъ айири.
Владимир Путиндихъди Сергей Меликов гюрюшмиш хьувалиъ Дагъустандин артмиш’вализ аьхю мяна а. Важиблу месэлйир гьял апIували ва федеральный центри дурариз разивал тувували республикайиз экономикайин артмиш’валин цIийи рякъяр ачмиш апIура. ГъитIиркку месэлйир гьял апIбу ерли агьалйирин уьмрин дережа за апIиди, гележегдин наслариз рягьят шартIар арайиз хиди.
