Зубайдат Шябанова

Гъюру йисан Табасаран райондиъ гъулариз шид хру кьюб аьхю турба ар-ццуз планарик кипна. Дурарикан сабпиб – Халагъ, Бухьнагъ, Гуми гъулариз, кьюбпиб – Къужник-Хючна гъулариз ву.

 

«Учу райондиъ кьюб шид хру турбйир зигуз пулин дакьатарихъди аьлакьалу месэлйир гьял гъапIунча. Кьюбиб проектарра республикайин кIулиъ айидари кьабул гъапIну. Сабпи проект уьмриз кечирмиш апIрудар аьгъю апIбан бадали, «Халагъ-Бухьнагъ-Гуми» штун турбайин проектдин электрондин алверар (торги) кIули гъухну, подрядчик мялум духьна. Гъюру йисан думу гъулариъ шид хьибди. Проектдиз 99 миллион манат харжар удучIвуру», – гъапну Табасаран райондин глава Мягьямед Къурбановди.

Кьюбпи проект, «Къужник-Хючна» шид хру турба гьяракатнаъ ипбан ляхнарикан ктибтури, райондин кIулиъ айири гъапиганси, думу гъулариз шид зигбан ляхнар гьеле Советарин Союз имиди ккергънайидар вуйи. Союз дабгъбан кьяляхъ, пул адру йисари ляхинра батIул гъабхьнийи. Гьамус, Дагъустандин Глава Сергей Меликовдин кюмекниинди, думу ляхнар цIийи кIул’ан ккергъуз 175 миллион манат деебтну. Электрондин алверар кIулиъ гъахбан кьяляхъ подрядчикра фуж вуш, мялум гъахьну.

Къужник-Хючна штун турбайин 10 аьгъзуртIан артухъ агьалйир марцци убхъру штухъди тямин апIуз мумкинвал тувди.
Къайд апIуз ккундучуз, гьаму кьюбиб объектарин заказчик Дагъустандин минстройин дахилнаъ айи «Гьюкуматдин саб вуйи заказчикдин дирекция» тешкилат ву. Думу тешкилатдин вакилари чпин ляхин вахтниинди ва намуслуди гъабхур кIури, умуд кивурхьа.