Феруза Рамалданова

 
Дагъустан республикайиъ спорт улихьна гъабхбак Хив райондин администрацияйи, дидин культурайин, жигьиларин, спортдин ва туризмдин месэлйириз лигру отделин гъуллугъчйири, гъулариъ йишвариин али спортдин мектебарин вакилари лайикьлу пай кивра. КьатI’иди гъапиш, спорт ва жигьилар – му кьюбиб гафар гьякьикьатдиъ тархьну гъюра.

Хив райондин ОКСМПиТ-йин спортдин меселйириз лигурайи пишекар Айдабег Мазовди субут апIурайиси, гъийин деврин дигиш’валар ва тIалабар фикриз гъадагъну, Хив райондиъ жигьиларин меселйириз, гьадму гьисабнаан тялукь гъатарин арайиъ спорт артмиш апIбаз аьхю фикир тувра.

 
– Дугъриданна, аьхиримжи йисари райондин гъулариъ артмиш шулайи наслариз ужуб тербия тувбан ва заан дережайин талитариъ хъуркьувалар гъадагъруси спортсменар гьязур апIбан метлебниинди хайлин шараитар яратмиш дапIна. Учу ич ляхниъ гъийин чиркинвалари абцIнайи девриъ живанар мюгькам сагъламвал хъади, дурар рюгьлувалин, ватанпервервалин, эдеблувалин лишнариккди тербияламиш апIбаз асас фикир туврача.
Гъи райондиъ спортдин артмиш’вализ фикир тувра, вушра, вари уьлкейиъ гъягъюрайи гьяракатар себеб вуди, гъузрайи камивалар сабишв’инди терг апIру мумкинвал шуладар. Мушваъ жямяаьтлугъра гъаври духьну ккунду.
Айи мумкинвалариз лигну, жигьиларин арайиъ кми-кмиди спортдин жюрбежюр талитар гъахурача, – къайд гъапIну дугъу.

Жаргъбаан кIубандар

Гьаму йигъари Хив райондиъ, Физкультурникдин йигъ къайд апIури, жигьиларин арайиъ жаргъбаан варитIан бажаранлудар мялум апIбан талитар гъухну. Турнир Урусатдин халкьарин сабвалин йисан лишниккди кIули гъубшну. Талитариъ иштирак хьуз «Центральный» усадьбайихьан Хив стадиондиинакьан жаргъбахьна аьшкь айи вари жигьилар ихтияр айи.
Маракьлуди кIули гъубшу гьюжатнаъ бажаранвал улупу Тагьир Исабегов (Асккан Ярккан), Султан МутIалибов (Хиван) ва Гьяжимурад Нурмягьямадов (ГъуштIлан) кьиматлу пешкешариинди лишанлу гъапIну. Дурарилан савайи, шубарин арайиъ ГъуштIил гъулан вакил Саида Уьмаровайи мушваъ заан удукьувалар улупну.

«Мерсийин» пешкешар бадали

Физкультурникдин йигъан гъаншариъ Хив стадиондиин райондин жигьиларин арайиъ райцентриъ ерлешмиш дубхьнайи «Мерси» кофейняйин пешкешар бадали футболианра турнир тешкил гъапIну. Талитариъ 12 гъулан вакилари чпин удукьувалар улупну. Кьюд йигъандин муддатнаъ гъизгъинди кIули гъушу талитарин натижайиъ Хиварин футболистари сабпи йишв гъибисну. Кьюбпи ва шубубпи йишвар АрхътIарин ва Хирччварин жигьилариз гъахьну. Гъалибчи командйир ва ужударстар футболистар тешкилатчйирин терефнаан пулин пешкешариинди, тялукь дережйирин кубокариинди лишанлу гъапIну.

Ав, жигьилар спортдиин илчIихнайивал гизаф мубарак ляхин ву. Гъит Хив райондин вакиларин арайиъ гележегдиъ заан хъуркьувалар гъазанмиш апIру спортсменар артухъ ишри.