Наргиз Гюлечова
3-пи октябриан 6-пи октябризкьан Мягьячгъалайин «Ак-Гёль» паркдиъ халкьарин сяняаьткарвалин шей’арин «Яратмиш’валин кIакIар» фестиваль кIули гъябгъиди. Серенжем Дагъустан Республикайин Глава Сергей Меликовдин кюмекниинди «Дагъустандин халкьарин сяняаьтар» региондин жямяаьтлугъ тешкилатди тешкил дапIнайиб ву.
Фестивалиъ Дагъустандин районариан, Урусатдин регионариан дуфнайи иштиракчйири 40-тIан артухъ майднар гьязур дапIна, кIулди майдан Узбекистандин сяняаьткрарира ккабалгна. Мажвгларин халачйирин фабрикайин вакилари чпин чадрикк фестивалин хялар ва иштиракчйир табасаран халкьдин милли сяняаьткарвалихъди таниш апIура.
«Аьхиримжи 2 вазлин арайиъ республикайиъ гизаф инсанар иштирак духьнайи саб жерге яркьу серенжемар кIули гъушну. Гьадрарикан саб августдин вазли Дахадаев райондиъ кIули гъубшу Къубачийин художественный комбинатдин 100 йис хьпаз бахш дапIнайи фестиваль вуйи. Мидланра гъайри, сентябрин вазли Дербент шагьриъра «Аьдатар уьрхюрайидар» фестиваль гъабхьну. Хъа «Яратмиш’валин кIакIар» фестиваль кIуруш, думу Урусатдин жюрбежюр регионариан вуйи устадари чпин яратмишарихъди халкьар таниш апIру проект ву. Му фестивалин дахилнаъди мастер-классар, выставкйир гъягъиди, дидин иштиракчйир сар-сарин тажрубайихъди таниш хьиди. Серенжем тешкил апIбиинди фестивализ дуфнайи устадарихьан гьамусдихъантина чпин арайиъ мянфяаьтлу йикьрарра йитIуз шулу», – ктибтнийи фестивализ бахш вуйи пресс-конференцияйиъ РД-йин туризмдинна халкьарин сяняаьткарвалин министерствойин управлениейин кIулиъ айи Рустам Аьрабхановди.
Выставка ачмиш гъапIу сабпи йигъан чпин сяняаьткарвалин шей’ар хьади дуфнайи хяларин арайиъ табасаран халкьдин сяняаьт уьбхюрайи Къарахановарин хизанра айи. Дурари выставкайиз халачйир ришру дуркьар хьади дуфнайи.
«Учу му жюрейин фестивалариъ ва выставкйириъ гьаммишан иштирак шулача. Улихьна йигъари Дербентдиъ кIули гъубшу фестивалиъра, дидин кьяляхъ Табасаран райондин 95 йисандин юбилейихъди аьлакьала вуди райондиъ тешкил гъапIу выставкайиъра гъахьунча.
Йиз варитIан асас метлеб жвуван халкьдин сяняаьткарвал кIваълан гьархну тарихдиз дурушбан бадали, гьаму дуркьар ктаури, халачйир урхури, ихь культура уьбхюз чалашмиш хьувал вуйиз. Учуз ккундайиб – халкьдин сяняаьт вуйи халачачивал артмиш дубхьну, аргъаж шулайи наслари халачи убхуз дудрубгъишра, гьадму чпин халкьдин сяняаьт вуйивал кIваинди гъибтуб.
Учу гьаму бицIи дуркьар ктаъбиинди ва дурар масу тувбиинди халачи убхуз аьгъю шулайи касар артухъ шула. Му жюрейин дуркьар Урусатдин хайлин регионариан вуйи касари масу гъадагъна. Магьа улихьна йигъари шубуд дуркьар Санкт-Петербург шагьриз хътаунза. Дурарин таза эйсйириз чпин веледариз халачи убхуз улупуз ккундайивалиин узу гизаф рази вуза», – гъапнийи Мурад Къарахановди (шиклиъ).
