Гюльнара Мягьямедова
Урусатдин ФСБ-йин Дагъустан Республикайиъ айи управлениейин гъуллугъчйир ДГПУ-йин студентарихъди гюрюшмиш гъахьну. Дурари жигьил наслиз уьлкейин сяргьятар уьрхбан гъулугънакан ктибтну.

Жюрбежюр факультетарин студентарин ва сяргьятар уьрхюрайи гъуллугъчйирин арайиъ гъабхьи сюгьбатнаъ Урусатдин хатIасузвал тямин апIбаъ пограничникари уйнамиш апIурайи роликан, пишекарвалин аьгъювалар за апIуз айи мумкинваларикан гъулхнийи. Сяргьятар уьрхру гъуллугъназ кандидатар гъядягъбакан кIури, дурарин бедендин сагъвализ, фагьмин аннамиш’вализ ва заан дережайин образование айивализ асас фикир туврайиваликан гъапнийи.

Гъуллугънан шартIарикан суалар туври, аьлава образование гъадабгъуз айи мумкинваларикан гьерхри, студентар сюгьбатнаъ ужуди иштирак гъахьнийи.
Сяргьятарин управлениейин вакилари пограничникарин гьар йигъандин уьмрикан хъайи-хъайиси ктибтнийи.
«Ич вазифа, жигьилариз Урусатдин ФСБ-йин гъурулушдин мумкинваларикан ктибтубси, дурарин ватанпервервалин рюгь за апIуб, военный гъуллугънан ад за апIуб, варитIан ужудар выпускникар гьюкуматдин сяргьятар уьрхбахьна жалб апIубра вуйич», – къайд гъапIнийи погрануправление-йин сар гъуллугъчийи.
Серенжемдин натижйирикан улхури, Р. Гьямзатовдин ччвурнахъ хъайи ДГПУ-йин проректор Руслан Гереевдли къайд гъапIганси, Урусатдин Федерацияйин мярифатнан министерствойи чан ихтиярнаъ айи педагогвалин вузариз кьувватнан гъурулушарихъди, министерствйирихъди ва идарйирихъди сигъ аьлакьа уьбхюз табшуругъар тувра. Мицисдар серенжемари партнервалин аьлакьйир мюгькам апIуз, идарйир заан аьгъювалар айи пишекрарихъди тямин апIуз кюмек тувру.