Зубайдат Шябанова
Вари уьлкейиъси, Ватандин Аьхю дявдин Гъалибвалин 81 йис Табасаран райондиъра яркьуди ва шадди къайд гъапIну.
Аьжалсуз полк
Гъалибвалин 9-пи майдин йигъан Хючна гъулаъ асас серенжемар Аьжалсуз полкнан дахилнаъди гъягъбалан ккергъну. Уч духьнайи ватандашар, Ватандин Аьхю дявдиъ иштирак гъахьи чпин абйирин шиклар хьади, Хючна гъулан гьацIкьял’ан Гъалибвалин паркдиз Мялум дару эскрин ядигарихъна гъушну.
Дурарин арайиъ Табасаран райондин глава Мягьямед Къурбанов, РД-йин Халкьдин Собраниейин депутат Ала-вудин Мирзабалаев, райондин администрацияйин вакилар, хусуси метлеб айи дявдин операцияйиан отпускдиз дуфнайи эскрар, райондин идарйирин ва карханйирин гъуллугъчйир ва райондин гъуларин жямяаьтар иштирак гъахьну.
Райондин кIулиъ айидари Мялум дару эскрин гьюрматназ уьмурлугъ кабхьнайи цIин ядигарихъ кюкйир дивбан кьяляхъ асас серенжемар ачмиш гъапIну.
Мягьямед Къурбановди уч духьнайидар Гъалибвалин йигъахъди тебрик гъапIну.
«Совет эскрари 81 йис мидиз улихьна ихь Гъалибвалихъ кьадарсуз аьхю кьимат тувну. Гъи ухьу ухьуз ислягьвал багъиш гъапIу эскрариз ухшар вуйидар духьну ккунду. Гьамусяаьт хусуси метлеб айи дявдин операцияйиъ Табасаран райондиан 4 агъзуртIан артухъ эскрар иштирак шула. Гьадди ватан уьбхюз васият гъапIу ихь абйирин рюгь чIивиди имбуваликан кIура. Ухьу ихь Урусатдин Игитар Рустам Мурадовдиинди, Эседулла Абачевдиинди, Ярамир Темирхановдиинди, Исрафил Мягьямадовдиинди, Руслан Къурбановдиинди ва жара эскрариинди дамагъ апIурахьа. Гъюру йисандин Гъалибвалин йигъ ухьу ислягьвалиъ къаршуламиш апIрувалик миж кивраза», – гъапну райондин кIулиъ айири.
Хъасин Мягьямед Къурбановди дюн’яйин вари дявйириъ гъийихдар кIваин апIури, дурарин гьюрматназ ккебехъну гъузру дакьикьа мялум гъапIну.
Дидин кьяляхъ Мягьямед Къурбановди, хусуси метлеб айи дявдин операцияйин иштиракчйир Абубакар Къурбанов ва Аьбдулбасир Рамазанов Кьягьялвалин орденар тувбиинди лишанлу гъапIнийи.
Серенжемдиъ Гъалибвалин машквар райондин вакилариз ва серенжемдин иштиракчйириз Дагъустан Республикайин кIулиъ айидарин терефнаан Алаудин Мирзабалаевди, Ватан уьбхюри хусуси метлеб айи дявдин операцияйиъ иштирак шулайи эскрарин терефнаан хусуси метлеб айи операцияйин игит, аьхюну лейтенант, танкарин полкдин аьлакьйирин батальондин начальник Расим Агъасиевди, Табасаран райондин военный комиссар Фарид Мусаевди тебрик гъапIну.
Гъалибвалин паркдиан уч духьнайидар Хючна гъулан майдандиина концертдин программайиз ва спортдин талитариз тамаша апIуз гъушну.
Мармардашдин кьулар
Къайд апIуз ккундузуз, Гъалибвалин йигъ улубкьайиз улихьна Табасаран райондиъ хусуси метлеб айи дявдин операцияйиъ кечмиш гъахьи 17 эскриз райондин 15 мектебдиъ мармардашдин кьулар ачмиш гъапIну.
«Гъи райондин 15 мектебдиъ думу мектебариъ гъурху эскрариз мармардашдин кьулар ачмиш гъапIунхьа. Дурар вари ватандин игитар ву. Гьамусяаьт швнуд-сад агъзур ихь ватандашар хусуси метлеб айи дявдин операцйириъ иштирак шула. Читинвалариз дилигди, чпин уьмур туври дурари ихь ислягьвал уьбхюз вари мумкинвалар агура. Чпин игитвалиинди гьякьлу эскер фицир духьну ккундуш улупура. Анжагъ саб СиртIич гъул’ан 300-дихьна эскер хусуси метлеб айи дявдин операцияйиъ иштирак шула. Баяр ва жилар гъийиху дишагьлйириз, абйир-бабариз, багахьлуйириз башсагълугъвал ккун апIураза. Гьаму мармардашдин кьулар мектебдин дамагъ ва дурарихьна вуйи уьмурлуг гьюрматнан лишан хьибди», – гъапну Мягьямед Къурбановди СиртIич гъулаъ мектебдин цалик гвардияйин аьхюну прапорщик Бару Аьбдусаламовдиз ва Аьбдулгьямид Саидгья-сановдиз мармардашдин кьулар ачмиш апIури.
Думу жюрейин серенжемар Хючна гъулан 1-пи нумрайин лицейдиъ, Ярса, АхьитI, ТIивак, Гувлигъ, СертIил, ЧвулатI, Имшнигъ, Гьесихъ, Хюряхъ, НичIрас, ЦIурутIил, ТинитI гъуларин ва Ягъдигъ гъулан 1-пи нумрайин мектебариъ кIули гъушну. Вари гьаму мармардашдин кьулар ачмиш апIбахъди аьлакьалу мажлисариъ райондин главайин заместителар, жюрбежюр идарйирин ва карханйирин кIулиъ айи вакилар иштирак гъахьну.
Концлагерарин йисир
Мармардашдин кьулар ачмиш апIбалан кьяляхъ, Табасаран райондин депутатарин Собраниейин председатель Иса Исаев ва Табасаран райондин главайин заместитель Заур Мусаев кIулиъ ади, райондин гьякимарин аьхю десте Хянягъ гъулаъ яшамиш шулайи, Ватандин Аьхю дявдин вахтна немцарин концлагерарин йисир вуди гъахьи Валентина Аслановайиин улукьуз гъушну.
Заур Мусаевди Валентина Васильевна муниципалитетдин глава Мягьямед Къурбановдин ччвурнахъан Гъалибвалин йигъахъди тебрик гъапIну ва дугъаз пулин пешкеш тувну. Дестейин дахилнаъди дуфнайи хялари варидари дишагьли тебрик гъапIну ва дугъаз кюкйир, багьалу пешкешар багъиш гъапIну.
Валентина Васильевнайи дявдиъ гъахьи чан адашдикан, дявдин кьяляхъ гъагъи йисарикан ва чан уьмрикан ктибтбан кьяляхъ, Хянягъ гъулан мектебдиъ урхурайи баяр-шубари Аслановайин хуларин гьяятдиъ бицIи концерт улупну.
