Гюльнара Мягьямедова
Гьар йисан сентябрин аьхириъ газатдин машариъ гьюрматлу ва важиблу пишейин эйсйир вуйи тербиячйир чпин пишекарвалин машкврахъди тебрик апIури, дурарикан макьалйир дикIури шулча. Гьаму ражари ужур тербиячи улупуб ккун апIури, узу «Табасаран райондин гимназия» МКОУ-йин аьхюну тербиячи Аният Байрамовайихьна илтIикIнийза. Дугъу 2006-пи йисхъанмина бицIидариз тербия туври ляхин апIурайи Индира Бедирхановайин ччвур гъибиснийи.
«Индира Уьмаровна бицIидарин ужур тербиячиси, дурарин абйир-бабарихъди гьар йигъан гюрюшмиш шулайи, бицIирин дерди-бала гьял апIурайи ужур инсанра ву. Думу бицIидариз ва дугъазра бицIидар гизаф ккунду. Машкврариз бицIидарихъди жюрбежюр утренникар гьязур апIруган, гьарсар бицIири чак кайи гьунар улупбиин зегьмет зигуру. Чпи гьязур дапIнайи серенжемдиз абйир-бабариз теклиф апIуру. Гьелбетда, дугъкан абйир-бабар гизаф разиди шулу.
Чаз айи пишекарвалиинди, аьгъювалариинди, марцци ляхниинди коллективдин арайиъра дугъу гьюрмат гъазанмиш дапIна. Индира Уьмаровнайи, педагогвалин советариъ ва семинарариъ удучIвну улхури, жигьил гъарашугъариз чан тажрубайикан, аьгъюваларикан мялуматар туври шулу. Гьацира думу райондин, республикайин дережайиъди гъягъру конкурсарин ва жара серенжемарин иштиракчира ву. Гьаму йисан Индира Уьмаровна Табасаран райондин главайин терефнаан гьюрматнан грамотайизра лайикь гъахьну», – къайд гъапIнийи гимназияйин аьхюну тербиячийи.
Гьелбетда, тербиячийин ляхнихъди ухьу гьарсар кас танишди вухьа. Ихь веледарра бицIидарин багъариз гъягъру вахт гъабхну. БицIидарин багъдиъ лихбан бадали образование цIиб ву, бицIидарихъди ляхин апIру касдиз кIваантIан бицIидар ккунди, дурарин гъавриъ ахъуз аьгъяди ккунду. Жвуван бицIидар варидариз ккунду, хъа жарарин бицIидар ккун апIуз шлихьан вушра шулдар. Гьамциб гьюрматлу зегьметназ тувру маважибра министринубсиб вуди ккундийи, хъа гьяйиф.
«Узу Липецкий областдин Чаплыгин кIуру шагьриъ бабкан гъахьунза. Жаквларикди тамшир апIру бицIи вахтнахъанмина тербиячи хьуз юкIв хъайиз. 2002-пи йисан Дербент шагьрин педагогвалин училище ккудубкIунза. Магьа 2006-пи йисхъанмина Табасаран райондин гимназияйиъ лихураза. Ич гимназияйин бицIидарин багъдиъ ужуб албагу коллективди ляхин апIурайич. Узу лихурайи бицIидарин дестейиъ, узуси, сарсана тербиячи лихура. Дугъан жавабдарвалира узуз аьхю кюмек тувра.
Сифте думу пишейин гьюрматлуваликан кIурза. Гьар наана гъягъюрашра, яв хиликкди аьхю гъахьи бицIидар алахъруган, дурарин шаду машар рякъруган, кIваз гизаф хуш шулу. БицIидарин гизаф абйир-бабарира тербиячийин гьюрмат уьбхюру. Хъа тербиячийин ляхин рягьятуб ву пуз шулдарзухьан. ВаритIан гъагъиб, увуз табшурмиш дапIнайи бицIидарихъан гъабхурайи жавабдарвал ву. Кми-кмиди бицIидар алдакури, чиб-чпик кчIихру вахтар шулу. БицIидарихъди ляхин апIурайи касдиъ, дурар вари уликк уьрхбан бадали, ургур улар ади ккунду.Учву йиз гъавриъ шул кIури, фикир апIураза, гъийин деврин бицIидарра, дурарин абйир-бабарра улихьнайинсдар дар. БицIидарихъдитIан абйир-бабарихъди ляхин апIуз читинди ву. Узу йиз ляхниъ ужуб гаф, пишекарвалин аьгъювалар, арайиз гъюрайи наразивалариан гиран даршлуси удучIвуз аьгъювал ишлетмиш апIури шулза.
Пишейин читинваларикан кIуруш, деврин жара ляхнариъси, ич ляхниъра аьхю кьадар документар гьязур апIбан, жюрбежюр конкурсариъ иштирак хьпан читинвалар алахьуру. Жиниб дар, тербия ва аьгъювалар тувбалан савайи, тербиячийиин жюрбежюр документар ацIбан вазифйирра ал. Думу ляхнари мектебариъ лихурайи мялимарра, тербиячйирра цIибси инжик апIура.
Ихь сюгьбатнан аьхириъ бицIидарин абйир-бабариз сакьюдар насигьятар тувуз ккундузуз. Ичв веледдин дуст йихьай. Дугъаз гьарсаб ляхниъ кюмек апIинай, дугъахьна вуйи ичв ккунивал улупуз гучI мапIанай, ич ва ичв кюмекниинди варитIан ужудар бицIидар аьхю апIидихьа!» – гъапнийи Индира Бедирхановайи.
Гьюрматлу тербиячйир! Ичв пишекарвалин машквар кIваантIан тебрик апIурача. Гъийин девриъ гизаф дадйириз чпин бицIидаризкьан хъайивал апIуз ккундар. Хъа учву 20-30 бицIириз лигурачва, дурарин бицIи уьмриъ аьхю йишв дибисначва. Ичв баркаллу зегьметнаъ хъуркьувалар ишричвуз, гьюкуматдира ичв зегьмет кIваълан гьадрапIриячв.
