Наргиз Гюлечова

2024-пи йисаз вуйи Дагъустан Республикайин «Йишван жягьтлувалар» проектарин конкурсдиз аьрзйир кьабул апIуб гьелелиг давам шули ими. Табасаран райондин ТIюрягъ гъулаъ айи бицIидарин багъ конкурсдиъ иштирак дубхьну, капитально рас апIуб планламиш дапIна.

Табасаран райондин администрацияйин пресс-гъуллугънаан тувнайи мялуматариинди, аьхиримжи йисари гъулаъ айи бицIидарин багъ муганаздин халачйир урхру маскуриъ ади гъабхьну, хъасин суддин къарарниинди думу идара гъулан администрацияйин хиликкна тувну.

Улихьна йигъари Табасаран райондин глава Мягьямед Къурбанов ТIюргъярин гъулан жямяаьтдихъди гюрюшмиш гъахьиган, гъулан агьалйири, му идара рас апIбан бадали, чпи «Йишван жягьлувалар» конкурсдиъ иширак хьуз гьязур вуйиваликан гъапну. Гъуландарин гафариинди, ТIюрягъ Табасаран райондин аьхю гъуларикан саб ву, ва гъул артмиш хьпан бадали, мушваъ гьаму деврин тIалабариз жаваб туврайи бицIидарин багъ чарасуз лазим ву. Эгер конкурсдиъ бицIидарин багъ рас апIбан проект гъалиб гъабхьиш, думу идара дибдиан дигиш хьибди, дидин материалинна техникайин бина цIийи алапIуз удукьиди.

Хъа конкурсдин шартIариинди, гьаму расвалин ляхнар тамам апIуз республикайинна муниципалитетарин бюджетариан ва меценатарихьан дакьатар лазим ву.