Наргиз Гюлечова
Улихьна йигъари Астрахань шагьриъ «БицIи ватан – Урусатдин кьувват» кIуру Вариурусатдин муниципальный III форум гъабхьну. Шубуд йисан хъади-хъади кIули гъябгъюрайи думу серенжем цци «Гьаму девриъ гьюкмин гъуллугъчийин кьиматлувал дугъан ляхнин ерийиъ рябкъюра» девиздиккди гъубшну. Дидин асас мяна Урусатдин муниципалитетар артмиш апIбаз кюмек тувуб ву.
«БицIи ватан – Урусатдин кьувват» форумдиъ, ерли идара апIбан, бизнесдин, жямяаьтлугъ тешкилатарин вакилар ва экспертар вари сатIи духьну, муниципалитетар артмиш апIбан стратегияйиъ фицдар месэлйир атIагну ккундуш, гаф-чIал гъубхнийи. Му серенжем гьар йисан тешкил апIурайивалиинди дина уч шулайи касариз сар-сарин тажрубайихъди таниш хьуз ва, ляхниъ алахьру меселйир фици гьял дапIну ккундуш, рякъяр агуз мумкинвал шула.
Ихь уьлкейин имбуну регионарианси, Дагъустандианра муниципалитетарин кIулиъ айидар «БицIи ватан – Урусатдин кьувват» Вариурусатдин муниципальный III форумдиъ иштирак хьуз гъушнийи. Гьадрарин арайиъ Кьибла Сухокумскдин глава Сейидягьмад Мамадов ва Казбековский райондин глава Гьяжимурад Мусаев айи.
Форумдиъ иштирак хьувалиинди му главйириз чпи регьбервал апIурайи муниципалитетариъ идара апIбан ляхниъ дигиш’валар тIауз ккунди айивал аьгъю шулайи. Кьюд йигъандин арайиъ серенжемдин иштиракчйири муниципалитетарин инфраструктурайин артмиш апIбан ужударсдар тажрубйирин гьякьнаан чпин фикрар ачухъ гъапIнийи.
Форумдиъ иштирак гъахьи Сейидягьмад Мамадовдин гафариинди, гьаму жюрейин серенжемариъ шерик шули, гьарури жвуваз айи тажрубайикан ктибтура. Гьацира жвуву регьбервал туврайи муниципалитетдиъ региондин ва федеральный программйир уьмриз кечирмиш апIбан бадали, дина дуфнайи иштиракчйирихъди гаф-чIал апIбиинди жара регионариъ ляхнар фу жюрейинди гъахураш таниш духьну, дурар нумунаси жвувахь ишлетмиш апIуз мумкинвал ккабхъра.
«БицIи ватан – Урусатдин кьувват» форум, ич шагьурси, бицIи шагьрарна районар ужуди артмиш апIуз аьхю мумкинвалар туврайи яркьу мярака ву. Серенжемдиъ иштирак хьуб’инди, гьамусяаьт Кьибла Сухокумск шагьур фици артмиш шулаш, душваъ фицдар проектар уьмриз кечирмиш апIураш, ктибтуз мумкинвал гъабхьунзуз.
Мисал вуди гъадабгъиш, гъи муниципалитет гьаму деврин шагьрариз барабар вуди дебккбан бадали, дидин кючйир, паркар, гьяятар ккабалгбан бадали, шнуб-саб проект уьмриз кечирмиш апIурача. Форумдиъ ич шагьриъ гъягъюрайи ляхнарикан серенжемдиз уч духьнайидариз ктибтуз мумкинвалра гъабхьунзуз», – аьлава гъапIнийи Сейидягьмад Мамадовди.
