Наргиз Гюлечова

 
2026-пи йис ихь уьлкейин Президент Владимир Путиндин Указдиинди Урусатдин халкьарин Сабвалин йис вуди къайд дапIна. Йисахъди аьлакьалу вуйи серенжемар ихь уьлкейин вари регионариъ кIули гъягъюра. Дагъустан Республикара дицдар серенжемарихьан ярхлади дийибгънадар. Мушваъ халкьарин Сабвалин йисахъди аьлакьалу вуди фукьан вушра серенжемар кIули духна ва хъанара хайлиндар гъахуз планламишра дапIна.

Улихьна йигъари Мягьячгъалайин «Дуствалин хулаъ» республикайин Главайин вазифйир вахтназди тамам апIурайи Федор Щукиндин регьберваликкди вуйи заседание гъабхьну. Думу серенжем Дагъустандиъ Урусатдин халкьарин Сабвалин йис фици гъябгъюраш, йисахъди аьлакьалу вуди мушваъ фицдар серенжемар гъахураш, гьаддиз ва серенжемарин планарикан вуйи месэлйириз бахш дапIнайиб вуйи.
Му заседаниейин иштиракчйир гьацира багарихьди улубкьурайи Дагъустандин Халкьарин сабвалин йигъан машкврахьн вуйи гьязурлугвалариканра гъулхнийи.

 
Серенжем ачмиш апIури, Федор Щукинди, халкьарин арайиъ сабвал ва сар - сарин гъавриъ ахъувал айиб хьадукран вазари республикайиъ гъургъу мархьар-селлери улупну, гъапну. Главайи мялум гъапIганси, гьадмуган саб дагъустанлуйири ваъ, хъа саки вари уьлкейин агьалйири читин гьялнаъ ахьу касариз кюмек апIури, халкьарин арайиъ айи сабвал улупну. Табиаьтдин завал дубхьну, Дагъустан читин гьялнаъ айиган кюмекнан хил гьачIабккдариз варидариз Федор Щукинди чухсагъул гъапну.
Къайд апIуб лазим вуки, Урусатдин халкьарин сабвалин йисахъди аьлакьалу вуди Дагъустандиъ уьмриз кечирмиш апIру серенжемарин программайиъ 84 яркьу мяракйир улупна. Гьадрарикан 46 серенжем сарун кIули духна. Думу мяракйириъ вари республикайиан вуйи яратмишарин дестйир, диндин вакилар, мяълийирин устадар, спортсменар ва хайлин жара касар иштирак гъахьну ва шулира ими.

 
Йисахъди аьлакьалу вуди республикайиъ Урусатдин культурайин министерствойин кюмекниинди кIули гъахурайи дюн’яйин халкьарин арайиъ вуйи пректарин серенжемарира аьхю йишв бисура. Цци Дагъустандиан вуйи гьюкуматдин театрари чпин сягьнйир ва республикайин артистари чпин концертар Запорожский ва Херсонский областариъ, Донецкдин халкьдин республикайиъ, Москва, Оренбург ва хъана жара шагьрариъ улупну ва багарихьди Мордовияйиз, Башкирияйиз, Самарайиз, Ульяновскдиз гъюгъюз планламиш дапIна.

 
Заседаниейиъ иштирак гъахьи республикайин культурайин министрин ляхнар вахтназди тамам апIурайи Зарема Бутаевайи туву мялуматариинди, Урусатдин халкьарин сабвалин йисахъди аьлакьалу вуйи аьхю серенжемар республикайиъ сентябрин вазли кIули гъягъиди. Владимир Путиндин Указдиинди, цци 8-пи сентябриъ сабпи ражари вуди уьлкейин дережайиъди Урусатдин халкьарин чIаларин йигъ къайд апIуз планламиш дапIна. Дагъустандиъ кIуруш, му йигъан «Лизи къарнийирин йигъ» юбилейный 40-пи фестиваль кIули гъябгъиди.
9-пи сентябриан 15-пи сентябризкьан СтIал-Сулеймандин ччвурнахъ хъайи паркдиъ халкьарин художествойин сяняаьтарин ярмаркйир ва жюрбежюр конценртар кIули гъягъиди. Сентябрин вазлин варитIан асас серенжем «Сабвал бадали сатIиди» ччвур тувнайи, Дагъустандин халкьарин сабвалин йигъаз бахш вуйи культурайин марафон хьибди.