Мейлан Нежефов

Гъулахьна гъюрайи рякъяриз, гъул’ина хурайи штуз, зигурайи аквариз кюмек апIбан бадали, саки вари сабси милаз удучIвну, зегьмет дизигну, жвувлантина ужувлан шил гъибтуб дегьзаманйирианмина ухьухь айи аьдат ву.

Улихьна йигъари, абйирилан гъубзу аьдат давам апIури, Хив райондин Хирижв гъулан агьалйирира, сабхилди удучIвну, гъулхьан чпин багълар-бистнаризди ва зиихъ мягьлайизди гъябгъюрайи рякъюъ гъяр’ин али гъяд рас рас гъапIну.
«Дугъриданра, гьамци ляхин ккюдюбгъруган, кIваз хуш шулу. Улихь вахтари му гъядлан деетнайи гакIвлин чIулар, дурарикк ккудукьнайи гъусйир, дурарин зиълан ккахьнайи шалмнар, тахтйир, шакв духьну, гьадахьурайи. Метлеб саб вуйивалиан аьхюр-бицIир дарпиди удучIвну, йигълан-йигъаз пуч шулайи 25 метр ярхишин ва 3 метр 70 см яркьушин айи гъяд саб бицIи вахтнан арайиъ 21-пи аьсрин тIалабариз жаваб тувруси дебккунча, яна арматура ккабхьну, заълан бетондин раствор улубзну, мюгькам гъапIунча», – разиди ктибтура му ляхникан гъулаз регьбервал туврайи Раюдин Фарзалиевди.
Дугъу пулиинди, гафниинди, зегьметниинди ва саб чIев хураг гьивбиинди вушра ляхниз яракар гъахьи гъулан агьалйириз ва саб филан-вуш гъул’ан кюч духьну удучIвну душнади, кюмекназ хъуркьу элугълийириз администрацияйин ва чан терефнаан аферин гъапнийи.

«Ихь халкьдик мициб ватанпервервалин рюгь ва дурарин дамариъ дагълу ифи либхури имбукьан гагьди, гъулар ичIи даршлубдиин умудлу вуза. Мицисдар ляхнариъ бакар хьуб аьхю савабнан ляхин вуйиб ихь диндиъра тасдикь дапIна. Гъачай, гьаму дюн’яйиъ имиди, ихь ужувлан ляхнариинди ухьуз женнет гъазанмиш апIурухьа, дустар», – аьлава гъапIнийи Хирижв гъулан советдин председатели.