Гюльнара Мягьямедова
7-пи апрели Владимир Путинди Дагъустандиъ аьхю мархьар дургъну арайиз дуфнайи аьгьвалатнан гьякьнаан совещание гъубхну. Видеоконференцияйин къайдайиинди Сергей Меликовди уьлкейин президентдиз региондин шагьрар-гъулариин шид улубчIвбан гьякьнаан ва гъахурайи ляхнарикан ктибтну.
«Бедбахтвали инсанарин арайиъ айи сяргьятар ктIушвуру – гъи Дагъустанди гьадму гафар субут апIура. Республикайиъ рягьимлувалин кюмек уч апIру 43 пункт ачмиш дапIна, рягьимлувалин фондари гъизгъин ляхин гъабхура. Кюмек тувбан ляхнариъ 1300-дилан зиина пишекрар иштирак шула, техникайин 241 аьдад жалб дапIна», – гъапну Сергей Меликовди Владимир Путиндихъди вуйи улхбаъ.
Совещаниейиъ РФ-дин Президентдин администрацияйин кIулиъ айи Антон Вайно, МЧС-дин глава Александр Куренков, табиаьтдин дакьатарин ва экологияйин министр Александр Козлов, сагъламвалин министр Михаил Мурашко, Урусатдин Президентдин СКФО-йиъ гьуркIу ихтиярар айи вакил Юрий Чайка ва жарадар иштирак гъахьну. Дагъустандиъ дубхьнайи аьгьвалатназ бахш вуйи совещаниейиъ Урусатдин Президентди къайд гъапIганси, 30-пи мартди республикайиъ шубуб вазли ургъру кьадар мархьар гъургъну. Табиаьтдин гьавйирихъди гюзчивал гъабхуз хъюгъю 1882-пи йисхъанмина региондиъ мициб мусибат гъабхьиб дайи. Владимир Путинди гъапиганси, аьгьвалат жавабдар касарин гюзчиваликк дубхьну ккунду. Шид улубчIвнайи йишвариъ кюмек тешкил дапIнайи вари касариз президентди чухсагъул мялум гъапIну.
«МЧС-дин кIулиъ айи Александр Вячеславовичдира, Дагъустандин глава Сергей Аьлимовичдира узуз мялуматар тувна. Зарар гъабхьи инсанариз кюмек апIбан гьякьнаан табшуругъар тувунза. МЧС-дин гъуллугъчйири, федеральный ва жара идарйирин, кьувватнан ва къанун уьбхру органарин гъарашугъари сатIиди ляхин апIура. Дурариз жвуван хушниинди кюмек туврудари ва волонтерари чпиан удукьру кюмек апIура. Гьюрматлу дустар, учвуз гьарсариз чухсагъул мялум апIуз ккундузуз», – гъапну Владимир Путинди.
Президентди гьацира федеральный ва региондин, ерли гьюкмин органари зарар дубхьнайидариз кюмек тувну ккуниваликан гъапну: «Инсанариз, дурарин аьрзйирихъ хъпехъури, вахтниинди лазим вуйи медицинайин ва жара кюмек тувну ккунду. Бедбахтвал гъабхьи йишвариъ эпидемиологияйин ва марццишнан аьгьвалатра ул’ан идипну ккундар. Гьарсаб хизандиз гъабхьи зарарнан кьадар аьгъю апIуб пчIу ляхин дар. Саб гафниинди, пишекарвалиинди ва хъайи-хъайиси ляхин гъайибхай».
Дагъустандиъ гьамусяаьт региондин дережайиъди чарасуз гьялнан къайда тяйин дапIна. Дидин гьякьнаан совещаниейиъ Урусатдин МЧС-дин кIулиъ айи Александр Куренковди мялумат тувну.
Совещаниейиъ гьюкуматдин кIулиъ айири гъапиганси, хулариз вуйи документар адру агьалйир кюмек дарди гъитидар. Дурариз гьюкуматдин терефнаан документар гьязур апIуз кюмек хьибди.
Урусатдин Федерацияйин президентдин табшуругъниинди Михаил Мишустинди Дагъустандиъ шагьрар-гъулариин шид улубчIвбахъди гъахьи зарарар терг апIбан бадали, правительствойин комиссия тешкил дапIна.
Правительствойин комиссияйин кIулиъ РФ-дин ватандаш оборонайин, чарасуз гьялнан дюшюшарин ва табиаьтдин хатIа-балйир ярхла апIбан ляхнариз лигру министр Александр Куренков тяйин гъапIнийи.
Комиссияйин дахилнаъ РФ-дин табиаьтдин министр Александр Козлов, Урусатдин штун дакьатарин федеральный агентствойин кIулиъ айи Дмитрий Кириллов, муштарйирин ва инсанарин ихтиярар уьрхбаъ гюзчивал гъабхру федеральный гъуллугънан кIулиъ айи Анна Попова, Урусатдин табиаьт ишлетмиш апIбаъ гюзчивал гъабхру федеральный гъуллугънан кIулиъ айи Светлана Родионова, Федеральный медико-биологияйин агентствойин кIулиъ айи Вероника Скворцова, экологияйин, технологияйин ва атомдин гюзчивал гъабхру федеральный гъуллугънан кIулиъ айи Александр Трембицкий, гидрометеорологияйин ва табиаьтдин гьавйирикан мялуматар тувру федеральный гъуллугънан кIулиъ айи Игорь Шумаков, Дагъустан республикайин глава Сергей Меликов, Президентдин Дальний Востокдин федеральный округдиъ вари ихтиярар айи вакил Мягьямад Рамазанов а.
Гьацира Михаил Мишустиндин табшуругъниинди комиссияйин дахилнаъ РФ-дин зегьметнан министерствойин, финансарин министерствойин, энергетикайин министерствойин, транспортдин министерствойин, сагъламвалин министерствойин, гъулан мяишатдин министерствойин, мярифатнан министерствойин, цифровой министерствойин, экономикайин артмиш’валарин министерствойин, МВД-йин, Росгвардияйин, госрезерварин федеральный агентствойин ва жара идарйирин вакилар тIаъну.
