Зубайдат Шябанова
Гьаму йигъари Табасаран райондин ЦIийи Лижва гъулан мектебдиъ гьадму мектеб ккудубкIу, ватандин маракьар уьрхюри хусуси метлеб айи дявдин операцияйиъ кечмиш гъахьи Мафедар Рамазановдиз мармардашдин тахта ачмиш апIбахъди аьлакьалу серенжем кIули гъубшну.
Сененжемдиъ эскрин хизанар ва майил-мадатар, Табасаран райондин главайин заместитель Ринат Мирзабалаев, мектебдин мялимар ва урхурайидар, гъулан жямяаьт, муниципалитетдин жямяаьтлугъ вакилар иштирак гъахьну.
Мафедар Рамазанов 1976-пи йисан 20-пи августди ЦIийи Лижва гъулаъ бабкан гъахьну. Мектебдиъ урхурайи йисари думу, мектебдинси, гъулан уьмриъра жанлу иштиракчи вуйи. 8-пи класс ккудубкIбан кьяляхъ думу Дагъустандин Огни шагьриъ спортдин кчIихбарин жюрйирин тренер-инструкторар гьязур апIру мектебдик урхуз ккучIвну.
Думу ккудубкIбан кьяляхъ Мафедар РФ-дин Яракьлу кьувватарин жергйириз гъухнийи. Гъуллугъ дугъу АйтIан кьушмариъ гъабхури гъахьну. Швнуб-саб ражари эскрарин частарин арайиъ спортдин кчIихбарин талитариъ дугъу гъалибвалин йишвар гъадагъну. Армияйин кьяляхъ Мафедар Ростов шагьриъ хиларихъди кчIихбан жюрйириан тренерди дийигъну. Мафедари чан ва чан хиликк ккайидарин рюгь гъалибваларихьна кьувватлу ва гьевеслу апIури, ужуб заан къайдайиинди дарсар гъахури гъахьну.
Чан ватанпервер фикрариз вафалу вуйи дугъу 2025-пи йисан эвелиъ РФ-дин Оборонайин Министерствойихъди контракт гъийибтIну ва ватандин маракьар уьрхюз хусуси метлеб айи дявдин операцияйиз гъушну. 2025-пи йисан мартдин 9-пи йигъан Курский терефнаъ Суджанский райондиъ гъягъюри гъахьи гъизгъин женгариъ думу кечмиш гъахьну.
Серенжемдиз уч духьнайидарихьна райондин глава Мягьямед Къурбановдин ччвурнахъан Ринат Мирзабалаев илтIикIну. Сабпи нубатнаъди дугъу кечмиш гъахьи эскрин хизанариз башсагълугъвал ккун гъапIну ва райондин агьалйири ихь игит ватандашдиинди дамагъ апIурайиваликан гъапну.
«Мафедар Насруллаевич рюгьнан кьувватлу, ватандиз вафалу, багъри уьлке нацизмдихьан уьбхюз гьязур вуйи дирбаш эскер гъахьну. Дугъан уьмрин рякъ – спортсмен, тербиячи, насягьятчи ва игит – фунур касдизра намуна ву. Дугъан ватандихьна вуйи ккунивал ва кьягьялвал ухьуз варидариз дарс гъабхьну. Живан ватандашарин игитваларикан кIваин уьбхюб ихь буржи ву», – гъапну дугъу.
Мафедар ужудар гафариинди кIваин апIури хайлиндар удучIвну гъулхнийи. Дурари Мафедарикан, эскриканси, думу ужур жилир ва адаш, рягьимлу инсан, фунуб вахтнара кюмекназ гъюру сабурлу ва вафалу дуст вуйибдикан ктибтну. Думу сабвахтнара читинваларихьан гучIрур дайи.
Мармардашдин тахта ачмиш апIбан кьяляхъ уч духьнайидари дидин улихь кюкйирин кунцIар дивнийи.
