Зубайдат Шябанова

Гьаму йигъари Табасаран райондин ТIаттил гъулан «ДеккучIимир» бицIидарин багъдин бинайиин Вариурусатдин пишекарвалин устадвал тасдикь апIру «ВаритIан ужур тербиячи — 2024» конкурсдин муниципальный ятаб кIули гъубшну.

 

 

Гьаму йисан конкурсдиъ гъалибвал бадали талитариз райондин мектебдиз улихьна вуйи образованиейин 6 идарайин тербиячйир удучIвну. Дурари педагогикайин ляхнин жюрбежюр цирклариан чпин аьгъювалар ва мумкинвалар улупну ва гьацира сар-сарин тажрубайихъди таниш гъахьну.
Конкурс, иштиракчйиризси, дина дуфнайи хяларизра машквар гъабхьнийи. ТIаттил гъулан бицIидарин багъдиз гъюрайи баяр-шубари уч духьнайидар шиърар урхбиинди, мяълийир ва ялхъвнар апIбиинди рази ктаъну.

Иштиракчйириз конкурсдин кьюб табшуругъ тувнайи. Сабпи, «Педагогикайин рякъюъ йиз хусуси цIийивал» табшуругъ тамам апIурайи вахтна дурари мектебдин яшнакк ккуркьну адру бицIидарин артмиш’валин ва тербияйин рякъюъ чпин ляхниъ ишлетмиш апIурайи асас къайдйир ва саягъар улупнийи. Хъа кьюбпи табшуругъ бицIидарихъди сатIиди гъахру серенжемариз бахш дапIнайиб вуйи.

Кьюбпи очный туриз 3 иштиракчи удучIвну. Конкурсдин натижйириинди сабпи йишван сагьиб Гьесихъ гъулан «Гевгьер» бицIидарин багъдин тербиячи Аьйиша Аьлимягьямедова гъахьну. Кьюбпи йишв Жулжагъ гъулан «Шадвал» бицIидарин багъдин тербиячи Саимат Агъагюловайи ва шубубпи йишв ТIивак гъулан «Гаргар» бицIидарин багъдин тербиячи Рукьият Къурбановайи гъадабгъну.

Шадлугънан серенжемдиъ Табасаран райондин администрацияйин главайин заместитель Заур Мусаев, райондин образованиейин управлениейин кIулиъ айи Аьбдусалам Гьясанов ва жарадар айи. Серенжемдин аьхириъ хялари тербиячйириз гележегдиъ хъуркьувалар ккун гъапIну ва конкурсдиъ гъалиб гъахьидариз гьюрматнан грамотйир ва пешкешар тувну.