Наргиз Гюлечова
15-пи майдиан 17-пи майдизкьан нубатнан ражари Дагъустандин Каспийск шагьрин «Анжи АРЕНА» стадиондин аьтрафариин Вариурусатдин жинснан чарвйирин ва цIигьарин выставка кIули гъябгъиди. Цци тешкил апIурайи выставка юбилейинуб – 25-пи ражари гъабхурайиб ву.
Аьдат вуйиганси, гьар йисан выставкайиз Урусатдин хайлин регионарианра, гъунши уьлкйирианра жинснан чарвйир ва цIигьар уьрхюрайи мяишатар иштирак шула. Гъийин йигъаз уьлкейин 12 региондиан саки 70 мяишатди выставкайиъ иштирак хьуз аьрзйир тувна. Гьадрарин арайиъ Волгоградский, Астаханский, Ростовский, Ивановский, Ленинградский, Калининградский областариан, Краснодар ва Ставрополь крайариан, Калмыкия, Дагъустан, Адыгея ва хъанара жара республикйириан малдарар а. Хъа Дагъустандиан му выставкайиъ чарвйир ва цIигьар уьрхюрайи 24 мяишат иштирак хьиди.
Республикайиз выставкайиз хурайи чарвйир ауз кIури, 1,6 агъзур квадратный метр йишвар гьязур дапIна.
Улихь ккимиди вуйи мялуматариинди, серенжемдиз Урусатдин гъулан мяишатдин министрин сарпи заместитель Максим Боровой ва малдарвалин департаментдин директор Сергей Воскресенский гъюз кка.
Выставкайин дахилнаъди чарвйир уьрхювалин циркил артмиш апIбаз, марччар уьрхюрайи сивар-галар ерццурайивалин месэлайиз бахш дапIнайи жюрбежюр гергми столар, хьайикан дапIнайи шей’арин ярмарка, 18 йис’инакьан яшар духьну адру бицIидарин ва живанарин арайиъ «Йиз марчч» ччвур тувнайи конкурс хьибди.
Вариурусатдин XXV юбилейный выставкайин дахилнаъди РД-йиъ айи Федеральный гъулан мяишатдин илмарин центри тешкил дапIнайи жинснан марччарин ва цIигьарин аукционра хьибди. Му серенжемдиъ жинснан чарвйир уьрхюрайи уьлкейин кIакIначи мяишатар иштирак хьиди ва дурарин йиккун, никкун ва хьайин, янаки эдильбаев, гиссар, дагъустандин дагълу, лезги, тушинский, лаконы, манычский меринос жинсарин марччар ва зааненский жинснан цIигьар уйнатмиш апIиди. РД-йин гъулан мяишатдин ва вахтназ вуди ипIру-убхъру сурсатарин министрин вазифйир тамам апIурайи Зураб Куччаевди туву мялуматариинди, выставкайиъ Урусатдин 12 регионарин 20-дихьнакьан мяишатариан 400 кIул марччар ва цIигьар иштирак хьиди.
«Выставкайихьна гьязур хьуз учу вахт ккимидитIан хъюгънайча. Гьязурлугвалин вари ляхнар ккудукIунча. Магьа 13-пи майдихъанмина выставкайин иштиракчйир яваш-явашди хъуркьра. Гъюрайи хялар дагъустанлуйириз хас вуйиганси кьабулра апIидихьа.
Мидиз улихьна йисариси дарди, цци выставкайин дахилнаъди ухьухьна духнайи жинснан чарвйир масу тувузра мумкинвал а», — гъапну Зураб Куччаевди.
