Наргиз Гюлечова

Гьаму йисан майдин 23-диан 25-дизкьан Каспийск шагьриъ ерлешмиш дубхьнайи «Анжи Арена» стадиондин аьтрафариин нубатнан ражари вуди XXIV Вариурусатдин жинснан марччаринна цIигьарин выставка гъабхувал планламиш дапIна.

Дагъустан Республикайин гъулан мяишатдин ва ипIру-убхъру сурсатарин министерствойиан тувнайи мялуматариинди, гъийин йигъаз выставкайиъ иштирак хьуз Урусатдин 13 региондиан 66 мяишатди (88 клетка) чпин разивал тувна. Гьадму гьисабнаъди 25 мяишат (13 клетка) Дагъустандиан ву.

Урусатдианси, гъунши гьюкуматарианра, гьадму гьисабнаъди Казахстандиан ва Беларусьдиан вуйи мяишатарира иштирак’вал апIуз планариъ а.
Гъубшу йисанси, ццира выставкайин дахилнаъди илимдинна тажрубайин конференцйир, марччарин йиккун сурсатарин ери за апIбан ва думу йикк, Дагъустандинси, жара регионарин базрариъ масу тувбан ва гьаддихъди сабси хьа гьясил апIбанна масу тувбан гьякьнаан месэлйириз бахш вуйи гергми столарра гъахуз планариъ а.
Мидланра гъайри, выставкайин дахилнаъди, Дагъустан Республикайинси, Ставрополь крайин, Калмыкия, Кабардино-Балкария республикйирин майднарра ва гьацира концертдин программара гьязур апIура.

Дарпиди гъибтуз хай шулдар, гъубшу йисан кIули гъубшу выстакайиз 16 агъзуртIан артухъ республикайин агьалйир гъафну.