Дагъустандин халкьарин сабвалин йигъ къайд апIурайивалихъди аьлакьалу вуди, 14-пи сентябриъ Республикайин Глава Сергей Меликовди чпин гъуллугънаъ тафавутлу гъахьи саб жерге дагъустанлуйириз гьюкуматдин наградйир тувбан гьякьнаан Указдик къул гъизигну. Указдиъ къайд дапIнайидарин арайиъ ихь ватанагьлийирра а.

Дагъустан Республикайин Главайин Указдиинди гизаф йисари баркаллу зегьмет зигбаз дилигну, Дагъустан Республикайин региондин табасаранарин милли культурайин автономияйин председателин заместитель Эльмира Аьшурбеговайиз ва Табасаран райондин «Гъуларин арайиъ айи кьялан библиотекайин гъурулуш» культурайин идарайин директорин заместитель Дун’яханум Ханягьмедовайиз «Дагъустан Республикайин культурайин лайикьлу гъуллугъчи», хъа А.А. Тахо-Годийин ччвурнахъ хъайи «Дагъустандин илимдинна ахтармишарин педагогикайин институт» РД-йин ГБУ-йин директорин заместитель, илимдин гъуллугъчи Низами Сафарялиевдиз «Дагъустан Республикайин илимдин лайикьлу гъуллугъчи» гьюрматнан ччвурар тувну.

Гьаму Указдиинди заан хъуркьувалар гъадагъбаз ва баркаллу зегьмет зигбаз дилигну, республикайин «Табасарандин нурар» газатдин редакцияйин кIулин редактор Гюлягьмад Маллялиев Дагъустан Республикайин Гьюрматнан грамотайиинди лишанлу гъапIну.

Гюрматлу ватанагьлийир! Учву ихь табасаран культура, илим ва чIал артмиш апIбак киврайи пай аьхюб ву. Гъит, гележегдиъра учвуз хъана заан хъурктьувалар ишри.

Редакцияйин коллектив